Gidayeg ang pelikulang BuyBust sa mga nitan-aw didto mismo sa 17th New York Asian Film Festival. Ang nakanindot kay di lang mga Pinoy ang nipadayag sa ilang pagdayeg.
Gibituonan kini ni Anne Curtis ubos sa direksyon ni Erik Matti. Gitakdang magpahigayon og premier showing ang BuyBust karong Dominggo, Hulyo 22. Sa Robinsons Galleria Cinema himoon ang premiere sa alas 7 s.g. ug tambongan mismo ni Anne.
Dugay nang nakapahigayon og premier showing ang usa ka pelikula dinhi sa Cebu mao nga angay kining atangan.
Human sa mga pakyutkyut ug paswitswit nga mga pelikula, kataw-anan na sab ang idalit sa Star Cinema sa sunod semana. Gibituonan nila ni Empoy Marquez ug Zanjoe Marudo, ang Kusina Kings ipasalida sa Hulyo 25.
Kauban nila dinhi si Ryan Bang ug Natalie Hart nga nakadapit og pagtagad sa mga tumatan-aw tungod sa way pugongpugong nga pagpaseksi sa pelikula nila ni Jericho Rosales nga Siargao.
Di ikalimod nga usa si Morisette sa mga paborito ug gikagubtang mang-aawit sa nasud karon. Ambot unsay birtud sa tingog nga makaabot og taas kaayong tono nga kagubtan man gyud sa mga mahiligon sa kanta.
Kaya ra kaayo ni Morissette ang mga tag-as nga nota pero ang mas nakapaukay sa mga tumatan-aw mao ang iyang whistle. Iya kining gigamit isip pakapin sa tumoy sa mga linya nga taas kaayo ang nota.
Hinoon, sa kanta nga Pangarap Kong Ibigin Ka nga orihinal ni Regine Velasquez, medyo naalang-alang si Morissette mao nga medyo naputol ang kanta una pa siya ni-whistle. Lahi kini sa iyang gibuhat sa Asap Chillout diin diretso ang pag-whistle niya sa maong kanta.
Mao seguro to nga nakaingon ang nanan-aw sa youTube nga nasayop si Morissette. Para nako, morag wa lang siya makatayming pagbwelo pero nilampos pa gihapon siya sa labing taas nga whistle niya adtong gabhiona.
Hapit gyud mapuno ang Pacific Grand Ballroom sa maong pasundayag nga Morissette Is Made - Cebu - The Homecoming Concert. Haum gyud ang ulohan.
Saludo ko. Ug garbo kaayo niyang gi-angkon nga taga Cebu siya sa mga ad libs niya nga Binisaya gyud. Nisamot ang pagpakpak sa mga nanan-aw.
Kon di lang mosaka sa iyang ulo ang iyang nakab-ot nga pagkainila nga mag-aawit karon, layo pa ang iyang maabot.