Dear Papa Joe,
Ako si Hanna, nagtrabaho kaniadto sa usa ka company as executive sssistant sa owner mismo sa kompaniya. Dako ang sweldo, dili kaayo kapoy ang work unya makahuwam pa gyud ug sash anytime labina og dunay mga emergency.
Ang akong problema kabahin sa akong amo nga babaye nga pwerti ka maldita, magsige og paninghag, gamayng sipyat mamalikas dayon.
Kanang kasaba nga dili makaon og iro. Na-immune na intawon ko. Wala gyud magdugay niyang assistant, ako ra siguro kay ako ra mang ipalapos sa pikas dunggan ang iyang mga kasaba.
Pero dihay wala na gyud ko makapugong kay na late lang kog 10 minutes sa among sabot, pwerti niyang sukoa ug iya kong giyawyawan sa coffee shop atubangan sa daghang tawo. Sa akong kauwaw, nakatubag ko niya ug pwerte niyang sukoa, iya dayon kong gi fire-out pagka ugma.
Pagkuha nako sa akong mga gamit sa office, niduol siya nako ug miigon nga “dawaton pa tikag balik, just beg and apologize”.
Nangaplay kog laing work pero minimum ra ang sweldo. Mobalik kaha ko sa akong previous nga amo? Duna sab baya koy pride. Please tambagi ko.
HANNA
Dear Hanna,
Well, kanang imong problema karon ikaw ra gyud maka desisyon niana. Career or pride? Remember, lisod ra ba kaayo pangitaon ang trabaho karon. Magsugod na pod kag balik sa uno, hangtud sweldo balik sa uno pod. Ingon ana gyud ng manarbaho ta, dunay mga consequences. Dunay gamay og sweldo, pero buotan pod kaayo ang amo. Asa man ka nianang duha?
If you want the job, lower your pride, adtua imong boss ug pangayog pasaylo. Huna-hunaa lang nga gitagaan nimo siyag second chance. Ug samtang nag work kag balik niya, pwede kang maghinayhinay og apply sa laing kompanya hangtud makakita kag maayong opportunity.
PAPA JOE