Nakabantay ka ba kamo? Maghilak ang adlaw kon walay taho bahin sa gidiling drugas. Daghang nadakpan. Ginagmay nga pakete ngadto sa binulto o minilyong kantidad sa gidiling drugas ang nasakmit sa awtoridad, Dul-an na sa duha ka tuig ang ngipon-sa-ngipon nga kampanya batok sa gidiling drugas sa administrasyon ni Presidente Rodrigo Duterte. Gani, giakusahan na siya nga nakalapas sa tawhanong katungod tungod sa paggukod sa butang nga makadaut sa pangutok sa tawo.
Apan wala pa gyud masumpo ang gidiling drugas. Epektibo ba kaha ang dul-an na duha ka tuig nga gubat sa drugas ni Duterte? O, dili ba kaha nga nagkompirmar nuon kini kon unsa na kalawom ang operasyon sa sindikato sa gidiling drugas? Moluntad pa og pipila ka tuig ang gubat una mapuhag ang problema sa drugas.
Sa miaging kaadlawon, unom ka mga tawo ang patay atol sa hiniusang “One Time Big Time Operation” sa mga sakop sa Police Regional Office (PRO) 7 uban sa Cebu Provincial Police Office (CCPO), kapulisan sa dakbayan sa Sugbo, Mandaue, Lapu-Lapu, Talisay ug ubang dapit sa lalawigan.
Gawas sa daghang nadakpan, kapin sa P 8 milyon ga balor sa drugas ang nasakmit. Ang labing daghang namatay mao ang operasyon sa lalawigan sa pagsilbi sa 23 search warrants, 30 warrants of arrest, 18 ka buybust operation ug usa ka pagpangibot sa mga tinanum nga marijuana.
Nakasikop silag 74 ka mga tawo, duha ang nakaikyas.
Ang mipadayon karon sa maong ilegal nga negosyo segurado nga grabe na kaagresibo o kaisog taliwala sa seryuso ug gihigpitan nga kampanya sa kagamhanan alang sa luwas nga katilingban.
Ang kampanya sa kagamhanan mas epektibo ug masubay sa legal nga proseso kon dunay pag-ayuda ug pagkabana sa mga sibilyan kinsa mas nasayod sa kalihokan sa ilang palibot. Sekreto kitang motaho sa awtoridad.