Kumusta na ang BRT?

Kumusta na ang BRT?

Unsa na man ang status karon sa P17 bilyunes nga Cebu Bus Rapid Transit (BRT) project? Mao ni proyekto nga nag-apil sa pulong nga rapid, paspas, apan nalangay. Ug di lang kay nalangay, hayan pang makanselar.

Si Cebu City Administrator Nigel Paul Villarete niingon nga wa pa sila makadawat og pormal nga komunikasyon gikan sa Department of Transportation (DOTr) o kaha sa National Economic and Development Authority (Neda) sa status sa Cebu BRT project.

Matod pa niya, ang Investment Coordination Committee (ICC) sa Neda magtagbo pa sa hinapos ning buwana aron desisyonan ang 23 ka kilometro nga Cebu BRT project gikan sa Bulacao ngadto sa Talamban.

Ang atong katapusang nasayran mao nga sila si DOTr Secretary Arthur Tugade ug si Presidential Assistant for the Visayas Mike Dino mirekomendar nga kanselahon ang BRT project tungod sa daghang mga katarungan.

Nahilakip niini ang kalangay sa pagpatuman niini ug nga di magsilbi ang BRT tungod sa kahagip-ot sa kadalanan sa syudad sa Sugbo. Ang kasagaran upat ka lane, unya kuhaan pag dedicated lanes alang sa BRT.

Apan ining buwana lang, ang BRT naapil sa gitawag nga “basket of solutions” sa DOTr sa pagsulbad sa kahuot sa trapiko sa syudad sa Sugbo. Apan dunay kondisyon – ipatuman lang kini sa mga karsada nga dunay tulo ka lanes sa matag kilid.

Ang gitawag nga “basket of solutions” naglakip sa usa ka monorail sa isla sa Mactan ug usa ka mass transit system gikan sa syudad sa Carcar ngadto sa syudad sa Danao.

Kay nasulod na sa basket ang BRT, padayon nga nangandam ang kagamhanan syudad sa Sugbo sa pagpatuman niini. Lakip sa gipangandaman mao ang pagpangitag kabalhinan sa mokabat sa 85 ka mga pamilya nga maapektahan sa rota sa BRT.

Si Francisco Fernandez, executive assistant ni Cebu City Mayor Tomas Osmeña, niingon nga gihangyo sa kagamhanan sa syudad ang World Bank (WB) nga aprobahan ang usa ka relocation action plan alang sa mga pamilya nga maapektohan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph