Gikahadlukan nga dili mahinayon ang pag-amendar sa atong batakang balaud tungod sa daghang mga problema nga giatubang niini.
Ang labing dakung problema mao ang constitutional assembly (con ass) diin ang mga sakop sa senado ug ubos balay-balauranan kon kongreso wala pa magkauyon kon unsaon nila pagboto. Samtang buot sa senado nga maglain silag botar gusto sa kongreso nga usahon sila. Laing suliran mao ang gisugyot ni Hose Speaker Pantaleon Alvarez pag-uktaba sa 2019 election aron kuno matutokan ug mapasar gayud ang proposed constitutional amendment. Daghang mga tawo ug mga senador ang supak niini. Apan suma ni Speaker Alvarez nga kon dili mouyon ang mga senador sa pag-postpone sa eleksiyon sunod tuig siya ug ang iyang mga kaalyado mopasiugda og people’s initiative aron ang mga botante mao na ang direktamenteng mo-propose og constitutional amendments aron dili ihinayon ang piniliay sa 2019. Ubos sa atong konstitusiyon ang people’s initiative maoy laing paagi sa pag-propose og charter change.
Tungod niining no election kon no-el daghan na hinuong mga tawo ang nagduda nga ang tinuod nga tumong ug tuyo niining pag-usab sa atong balaud karon mao aron malugwayan ang termino sa mga pulitiko. Inay nga nindut na unta ang dagan ug suporta niining pagsagop sa nasud sa federal system karon nipatigbabaw na hinuon ang pagduda sa katawhan.
Ang Department of Tansportation (DOTr) mipugong sa pagpatuman sa Bus Rapid Transit (BRT) sa Cebu ug Metro Manila nga mobalor og P53-billion. Si DOTr Secretary Arthur Tugade mipahibawo niadtong Martes nga hunongon usa ang pagpatuman sa BRT hangtud mahuman ang dugang pag-estudiyo niini. Nahibaw-an nga kaniadto pa si Tugade mipahibawo na nga dili siya interesado sa maong BRT project. Kining maong kalambuan makapaluya na usab kang Cebu City Mayor Tomas Osmeña. Ambut og tinuoron ba sa mayor ang iyang gisaad nga kon dili kini mapatuman sa DOTr ang Cebu City mismo ang mo-implementar niini.
Dinhi sa Cebu City gidili ang mga tindahan sa pagamit og plastic bag matag adlaw nga Miyerkules ug Sabado. Sa Mandaue City gidili gayud ang pagamit niining mga plastic bags matag adlaw. Sukad nagsugod kining pagdili sa pagamit niining mga plastic bags maayo na ba ang dagan sa atong kanal ug imbornal? Nagtuo ako nga wala ra gihapon kini epekto kay wa man idili ang pagpamaligya ug ang pagamit sa mga disposable plastic products. Ang labing grabeng mobara sa mga kanal mao kining mga plastic bottles nga sudlan sa tubig nga ipamaligya sa hapit tanang dapit. Ang mga basiyo niini atong makita nga magpasad lang labi na sa esteros ug kasapaan.
Apan ambut og mapahunong ba kining maong negosyo nga gipanag-iya sa mga gamhanang mga negosyante. Kon mao na kini ang debatihan sa mga konseho magbaha na unya ang lobby money ang isuborno sa mga konsehal aron dili kini mahimong ordinansa. Paet!