USA sa nag-unang sumsuman sa social media karon mao ang way katapusan nga reklamo ug komentaryo labot sa dagan sa trapiko dinhi sa ato. Apil na dinhi ang problema sa trapiko dinha sa Mambaling. Ingon sa way kaluya nga naghisgot ang atong kaigsoonan diha sa social media pinaagi sa ilang nagkadaiyang post nga nagpaghot kanunay sa mga hingtungdang ahensiya pagpangita og dinaliang solusyon. Nisamot kasibaw ang mga komentaryo diha sa social media sa dihang gi-pullout ang mga traffic enforcer sayo ning semanaha. Ang hinungdan di na angay hisgutan pa basta kini nakamugna gyud og kaguliyang diha sa karsada.
Green
Ang green light kun go signal diha sa eskina nga apektado sa trapik sa Mambaling, maisip nga labing gipaabot kanus-a mosiga ang green signal ilabi na niadtong mga masakiton ug kadtong gusto na nga motuman sa sugo sa lawas. Usa sa mga post sa social media nga akong nabasahan mao kadtong komentaryo labot sa paagi unsaon nga mahimong makiangayon ang interval kanus-a mopula o moberde ang suga diha sa intersection. Pananglit diha sa eskina padung sa Natalio Bacalso Ave. , Highway Tagonol ug padung sa South Coastal Road. Ang reklamo sa mga driver og jeep ug ubang motorista, nga mas taas og oras ang gikan og padung sa SRP kay sa mga molabang padung sa Tagonol og Natalio. Unta hatagan og mas taas nga minutos kadtong nagsakay sa jeep tungod sa ilang sitwasyon. Sa akong naobserbahan karong bag-o ang gihimo sa Citom mao ang pagbutang og enforcer sa maong eskina og ang enforcer nay nagbuot kanus-a moabante o mohunong ang nagsinardinas nga mga sakyanan. Mao ni sakto sanglit ang enforcer maka kita man sa sitwasyon. Ang traffic light nagtuman ra man sa minutos nga gigahin kanus-a mag-ilis sa kolor sa suga. Mao unta sab ni ang buhaton diha sa North Road sa Mandaue City. Di kaayo ta magsalig anang traffic light. Kong gikinahanglan gyud mopatunga ang traffic enforcer og isalikway lang una ang siga sa suga.
Pacquiao
Sa atong Asoy sa niaging Sabado, nihisgot ta og knockout nga maoy siyaget sa taga Pinamungajan atol sa away ni Manny Pacquiao ug Lucas Matthesse. Natinuod ang maong siyaget ug sa text message ni Mayor Glenn Baricuatro, subli niyang gipahalipayan si Manny. Matod niya padayon ang ilang suporta kang Manny nga kaliwat og taga Pinamungajan. Human kang Manny, ang lain na sab nilang gipanghinaot ang kalamposan ni Junmar Fajardo alsng sa iyang ika lima nga sunod sunod nga MVP Title sa PBA. Sa pagkakaron, base sa statistics, nag-una na ang garbo sa Pinamungajan.