MADAGAYAON nga kalamposan ni magpapatigayon Prisca Niña Mabatid. Gikan sa kakabos ngadto sa pagkaadunahan. Dakog tampo sa paglampos ang iyang gihuptang abilidad, utokan, matahom ug mabination. Wala mangahas sa paghikalimot nga nagpuyo kaniadto sa kilid sa sapa sa Mabolo. Tag-iya sa Pinoy Care nga motabang niadtong gustong molalin sa New Zealand, Canada ug Middle East. Dunay placement agency sa magtinguha nga motrabaho sa gawas sa nasod. Haom ang iyang mga kasinatian nga himoan og kasaysayan. Misulod sa kalibotan sa politika. Giawhag ni Mayor Tomas Osmeña nga padaganon og barangay kapitan sa Mabolo. Siyay gihulip ni Kapitan Rey Ompoc nga dumadapig sa BOPK. Si Mabatid nagpaluyo kanunay sa kandidatura ni Osmeña sa mga milabayng piniliay. Bisan niadtong higayon nga napilde ni Mayor Mike Rama padayon si Mabatid nga nagdasig ni Osmeña pagpatambong sa iyang mga kalihokan. Apan nahingangha nalang si Mabatid sa kalit nga pagluib kay didto mosuporta sa iyang kaatbang nga si Atty. Daniel Arguedo. Midaog tuod si Mabatid sa eleksyon apan hingpit nga gihinginlan sa BOPK. Misang-at og quo waranto petition sa MTCC si Arguedo pagbaliwala sa proklamasyon kay giingong si Mabatid tua magpuyo sa Talamban. Gitudlo ni Pres. Rodrigo Duterte si Mabatid nga Consultant on OFW sa samang higayon gipadagan og ABC president kontra sa kasamtangang ABC Philip Zafra sa Tisa kon magpasubli ug sa gisabak sa BOPK nga si Kapitan Franklyn Ong sa Kasambagan. Si Ong giingong campaign fund contributor ni Osmeña ug nakakontrata og negosyo sa City Hall sa paghakot og basura sa iyang gipanag-iya nga Pasajero Motors. Gipasakaan og kaso ni Cris Saavedra nganong nakakontrata ang opisyal sa gobyerno. Nag-ong-ong ang kadaogan sa panalangin ni "Santo Tomas" sa ABC ug peligro matikyaob ang sakayan sa kontra.
Nakamansa sa hamis nga ngalan ni Mabatid kadtong pagtumaw sa sirkumstansya. Tagdumala sa Waterfront Cebu City Hotel and Casino ug tulo ka mga empliyado sila si Irene Juliet Lacerna, Welbert Pepito ug Edwin Acuyan misang-at og kaso sa Ombudsman batok ni Mabatid nga grave misconduct, conduct unbecoming of a public officer ug conduct pre-judicial to the Public Service subay sa RA 6713 o Code of Conduct ang Ethical Standards for Public Officials and Employees. Gitumbok nga naninghag sa hotel staff kauban sa giangkong bana Ramon Floresta nga namatid sa gwardya ug mihana og dagmal sa duty manager sa dihang gisita og guest ba sila. Basin nasipyat sa gisagop nga prinsipyo nga “the customer is always right”. Inosente sila kay kaso paman. Gidugayon sa panahon maoy makatangtang sa mansa, apan magpabilin ang lama sa kagahapon.