SAGUNSON na ang mga pagpamusil dinhi sa Metro Cebu ning nakalabay nga mga adlaw. Niadtong Huwebes sa hapon, si kanhi SPO2 Armando “Ahmed” Lozano naangol human pusila sa duha ka mga tawo sud sa tunghaan sa Labangon, Cebu City.
Kon wa pa makatago si Lozano sa usa sa mga lawak sa tunghaan, hayan patay na siya.
Gihimo kini sa duha ka mga gunman sud sa tunghaan diin daghan ang mga tawo ug duna pay presensya sa duha ka dagkong mga opisyal sa siyudad.
Kagahapon namatay sa ambush ang konsehal sa Lagtang, Talisay City nga si Stephen Bas, kinsa usa pa ka estudyante ug bag-ong napili nga barangay councilor.
Wa pa gani makuha ang lawas ni Bas sa crime scene sa may South Coastal Road, nangamatay usab sa ambush ang tulo ka mga piniriso sa Talisay City Jail.
Sa wa pa kini mahitabo, daghan pang mga pagpamusil ang nahitabo sa Sugbo.
Apan makapahimangod tungod kay ingon sa wa matandog ang kapulisan ning mao nga mga hitabo. Alang nila, luwas pa gihapon ang Sugbo puy-an.
Matod ni Police Regional Director Debold Sinas, duna nay mga target ang mga killer. Sa ato pa, di pinataka ang pagpamusil. Di si bisan kinsa lang ang target.
Bitaw, di si bisan kinsa ang target ug ang uban kwestyonable pa ang pagkatawo. Apan ang mga bala nga mogawas sa sumbohan sa armas, di magpili o moila og tawo. Mao kini ang nakapakuyaw sa mga pagpamusil. Mas kuyaw na gani karon kay ang mga gunman di na magpili og lugar basta lang makuha ang ilang target, sama sa nahitabo kang Lozano, Bas ug barangay konsehal Roel Mabano.
Hayan sakto si Cebu City Mayor Tomas Osmeña nga di na luwas puy-an pa ang Sugbo. Ang nakapakuyaw, way bisan usa ning nanglabay nga mga pagpamusil nga nasulbad, nagbalikbalik ra ang ilang sulti sa mga pulis, maorag plakang buak.