Dear Noy Kulas,
Ako si Penny, minyo, 38 anyos. Naa na ko sa abroad nagpuyo for more than 5 years. Tanan nagtuo nga nindot nag life sa abroad, apan sa tinuod lisod kaayo.
Di ko happy sa akong life kay di mi magkasinabot sa akong bana nga foreigner. Gawas nga grabe siya kaseloso, managmal pa. Tanan nakong lihok iyang binantayan. Bisan ang akong cellphone iyang pang-ukbon ang messages ug PM. Wa koy privacy. Aron lang gani naa koy sekreto, akong gihimoan og e-mail nga wa siya makahibawo. Pero di ra ni mao. Ako siyang nasakpan nga dunay laing babaye, di lang usa, kon di daghan. Ang uban naa pa sa Pilipinas.
Gusto kong mobiya niya, pero ang nakapait kay naa mi duha ka anak. Nahadlok ko nga basin kuhaan ko og custodial rights sa mga bata kay rich ang akong bana. Ingon niya nga ang tanan niya akoang masunod basta magpabilin ra ko niya. Karon, iya ra kong pagahatagan kay wa ko niya patrabahoa aron makaatiman sa mga bata.
Noy, di ko happy sa akong life karon. Gusto na kong mokalas pero nahadlok sab ko kay mag-unsa man ko diri sa abroad nga no work man ko. Please tambagi ko.
PENNY
Pen,
Maisip nga gihikawan ka sa kagawasan sa pagpanginabuhi aron di ka makalihok sa unsay imong gusto. Magsalig ka lang niya. Mao baya ni ang gibuhat sa ubang mga lalake nga klarong tinuyo. Wa intawoy mabuhat ang mga asawa kay inutil man sila kon way makuhang suporta. Tan awa sab kon duna bay mabinlan sa mga bata nga center aron ka makalihok.
Kon kahibawo ka mo-research sa mga balaud nga may relasyon sa imong kahimtang karon, mas maayo. Ma-Google ra na nimo ang tanan. Mas maayo man gud na kay sa ingon niana, makahibawo ka kon unsa ang imong sunod nga lakang nga pagahimuon. Di man tingali lisod ang pagpangayog panabang kon citizen ka na.
Ang lain nimong mabuhat mao ang pagkarinyo sa imong bana. Kana bang imong ipakita nga ikaw paraygon ug kombinsihon nimo nga tugtan kang makatrabaho bisan part-time aron ka malingaw. Basin madala na sa imong parayeg. Iampo usab sa Ginuo nga abagan ka. From there, anha ka na magplano sa next step.
NOY KULAS
Alang sa imong problema, e-mail sa kulassuper@sunstar.com.ph ug rojval69@yahoo.com