SUGDAN na sa kagamhanang lokal ubos sa administrasyon ni Mayor Oscar Moreno ug pinaagi sa City Local Environment and Natural Resources Office (Clenro) ang pagpahibalo sa pag-regulate sa pagamit og plastic bags sa tibuok dakbayan sa Cagayan de Oro.
Ang education and information campaign sa Clenro, sa pagpangulo ni Engr. Armen Cuenca, sugdan na sa dili madugay samtang ang full implementation sa pag-regulate sa plastic use sugdan sa Enero 2019.
Matud ni Ms. Elvisa Mabellin, division head sa Solid Waste Management sa Clenro, andam na ang Implementing Rules and Regulations alang sa maong kamandoan.
Subay niini, mandoan na ang mga negosyante ug mga establisemento sa pagsunod sa “Bring Your Own Bag” program ug pagamit sa recyclable ug reusable bag isip alternatibo sa plastic packaging materials. (PR)