GIPASABOT sa kompanya sa Globe nga dili gayud maangkon sa gobyerno sa Pilipinas nga makapahimos sa libreng internet gumikan sa ka limitado sa cell sites.
Kini ang gibutyag ni Patrick Steven Gloria kinsa Director sa External Affairs sa Globe Telecom Inc. sa mga sakop sa prensa.
Matud ni Gloria nga si Presidente Rodrigo Duterte nagtinguha og libreng internet sa nasod apan lisod kini nga mahitabo gumikan sa kagamay sa cell sites.
Ang nasod sa Pilipinas aduna lamang 21,000 ka mga cellsites diin 50 porsiyento niini gipanag-iyahan sa Globe kon itandi sa Japan nga dunay 220,000 ka cell sites samtang 1, 180,000 ka mga cell sites sa nasod sa China.
Giingog magbahinay sa usa ka cell sites ang 2,224 ka tao gikan sa 47.3 milyon nga mga internet users sa nasod sa Pilipinas.
Matud ni Gloria nga labihan kadaghan sa ga share maoy rason labihan sab ka hinay ang internet speed.
Dili sab sayon ang pagpatukod sa cell sites tungod sa kadaghan nga rekisitos, wala pay labot niini ang P50K ngadto P200K nga renta sa tukoran.
Lakip niini ang mga pipila ka rason sama sa mga petisyon sa mga residente nga tukoran ang ilang mga dapit sa kabalaka sa radiation nga maghinungdan sa sakit nga kanser.
Kon itandi sa nasod sa Japan walay nasakit ug mas daghan ang senior citizen bisan pa og daghan kaayo sila og cell sites nga daw makita sa bisan asang dapit.
Taliwala sa kagamay nga cell sites sa Pilipinas gidugang ni Gloria nga grabe usab kaayo mogamit og internet ang mga tawo sa nasod itandi sa Japan nga moabot lang og 40 minutos.
Matud ni Gloria nga ang Globe andam motukod og mga cell sites apan tungod sa pipila ka mga babag hinungdan sa pagkalangan niini.
“Ako nanawagan sa katawhan, mga kapitan, mga LGU nga tugotan kita sa pagtukod sa atong mga cell sites aron mas mapalapad ang koneksyon nato sa katawhan.” Pasabot niini.