NILANDING sa tambalanan ang usa ka dalaga human gisagpa, gibun-og sa uyab niini mga alas 8 sa gabii niadtong Huwebes, Hulyo 19, sa lungsod sa Jasaan, Misamis Oriental.
Giila ang biktima nga si Sheena Marie, 19 (apelyido gitago) residente sa susamang dapit ug ang nagsagpa si Jimson, uyab sa dalaga nga lumad taga El Salvador City.
Ang ig-agaw sa biktima nga si Marialyn nibutyag sa SunStar SuperBalita nga ang uyab sa biktima maoy responsable sa pagpamun-og gumikan kay nasuko kini og maayo dihang dunay mga nabasang text sa cellphone.
“Nakabasa siya og mga I love you sa cellphone ni Sheena. Mao dayon iyang gisagpa ug gisumbag,” matud niini ug miingon nga suko kaayo ang si Jimson sa dihang milakaw human sa insidente.
Gibutyag sab niini nga wala siyay kasayuran kon duna bay laing uyab iyang higala.
Ang biktima anaa karon nagpatambal sa Northern Mindanao Medical Center kinsa desidido mopasaka og kaso batok sa hinigugma. (SVB)