ESTRIKTO si Misamis Oriental Governor Yevgeny Vincente Emano kon siya man ang mamahimong mayor sa dakbayan sa Cagayan de Oro.
Kini iyang pamahayag niadtong Huwebes, Hulyo 19, atol sa iyang programa sa usa ka sibyaan sa radyo human adunay mga mensaheng nag-aghat kaniya nga modagan pagka-mayor ug kontrahon si Mayor Oscar Moreno sa umaabot nga piliay.
Matud ni Emano nga kon mahatagan siya og kahigayonan nga makaserbisyo isip mayor sa dakbayan siguradong dili malipay ang katawhan tungod kay estrikto siya ug daghan iyang makontra.
Una, ang taga City Hall siguradong dili mobotar kaniya tungod kay kon maulahi sa flag raising, iyang ianunsyo ang pangalan apan dili tinguha nga pakaulawan.
Ikaduha, dili siya makatugot og double parking sa mga kadalanan ug iya kining ipang-clamp ug penaltihan og taas, apil mga establismento nga dili mahimong motukod kon walay parking area. Dinhi posibleng masuko na usab ang mga negosyante kaniya.
Lakip sab niini ang pagmando sa kapolisan nga magbantay sa matag kanto sa kadalanan aron mapakgang ang nagpdayong tulis ug pagpangawat samtang ang mga barangay tanod iyang mandoan nga makiggukod sa mga dautang element ug iyang nakita nga mang reklamo kini tungod kay dili na makapahuway.
Lakip sa ipatuman ni Emano ang pagdili pagpaninda sa sidewalk ug kon mosupak pasakaan gyod og kaso.
“Mas maayong tinud-on og dakop aron mapitol kaysa dagmalan ug pangsipaon,” dugang sa gobernador.
Dugang sa gobernador nga bisan paman sa kadaghang problema sa siyudad apan iyang nakita nga aduna kiniy kasulbaran.
Hinuon giklaro ni Emano nga pananglitan lamang kini kon siya ang makahupot og posisyon apan una na niyang giingon nga tapuson iyang termino isip gobernador sa Misamis Oriental.
Dako iyang respeto kon unsa man ang mando sa iyang partido sa PaDayon Pilipino.