PABILIN pa nga nagpaalim sa Northern Mindanao Medical Center (NMMC) ning dakbayan sa Cagayan de Oro ang duha ka mga bata human nahulog sa kabaw niadtong Hulyo 17, 2018 sa Talakag, Bukidnon.
Talandugon ang kahimtang sa managsuong James Gatao, 5 anyos ug Vejie Gatao, 4 anyos, pulos residente sa maong dapit.
Sa nahipos nga impormasiyon gikan sa NMMC, matod sa inahan nga nagsakay sa kabaw ang iyang mga anak dihang gikurat sa ilang silingan nga hubog ang kabaw hinungdan nga kini nilukso.
Nahulog ang duha ka mga bata ug natumban sa kabaw ang ulo ug nawong niini samtang ang usa ang nalatayan sa balsahan nga kargado og galon sa tubig.