SIKOP sa kapolisan ang iladong kawatan sa Cagayan de Oro. Ang tulisan giila nga si Jinggoy Sevilla, ulitawo, lumad nga taga Baliwagan, Balingasag, Misamis Oriental.
Dungan niini ang panawagan sa mga nabiktima ni Sevilla nga mopatim-aw sa Police Station 1 (PS1) sa Divisoria.
Matod ni Police Chief Inspector Julius Clark Prisco Macariola, hepe sa PS1 sa Divisoria nga nahinabi sa SunStar SuperBalita, nga ilang pasakaan og kasong robbery with intimidation ug child abuse ang suspetado human nasapon kining nanulis og usa ka menor de edad.
Matod pa nga samtang nagpatrolya ang kapolisan sa PS1 ilang natikdan nga adunay kagubot nga nahitabo sa Velez/Macahambus St. ning siyudad alas 2:55 sa hapon, Hulyo 18.
Sa ilang pagsusi nangayo og tabang ang usa ka batan-on tungod kay gipugos pagkuha sa suspek ang iyang mga gamit.
“Pagduol sa kapolisan nanagan ang katong duha ka dautang elemento ug ang isa nagunitan ug mao na identify nga si Jinggoy,” matod ni Macarolia.
Nakuha gikan sa suspek ang mahalong relo sa biktima nga nagkantidad og P1500 ug ang usa ka kutsilyo.