UNOM ka kaso sa leptospirosis ang natala sa Cagayan de Oro City Health Office (CHO) sa bulan sa Enero hangtod bulan sa Hulyo sa unang semana ning tuig diin usa niini ang nakabsan sa kinabuhi.
Tulo sa mga biktima gikan sa Distrito 1 sa Barangay Carmen, Patag ug sa Barangay Lumbia samtang laing tulo usab sa Distrito 2 gikan sa Barangay Camaman-an, Tablon ug Barangay Bayabas.
Matod ni Kevin Ruiz, sa Disease Surveillance Office sa buhatan sa CHO nga nahinabi sa SunStar SuperBalita, nga ang namatay usa ka lalaki nga taga Barangay Bayabas niadtong bulan sa Abril.
Bisan paman niini, matod ni Ruiz dako usab ang pag-ubos sa kaso sa leptospirosis karong tuiga gikan sa Enero hangtod na sa Hulyo.
Itandi sa milabay’ng tuig nga adunay 34 ka mga kaso diin duha ang natalang namatay apan karong tuiga niubos kini sa unom na lamang ka kaso ug usa ang patay sa susama nga mga bulan.
Ang leptospirosis makuha gikan sa hugaw ug ihi sa mga ilaga ug ang mga simtomas niini naglakip sa hilanat, paspas nga pitik sa kasingkasing o pagginahawa, dala o pula ang mga mata, pagsakit o labad sa ulo, pagsuka, pagsakit sa tiyan, kalibanga, gamay o walay ihi ug pagsakit sa batiis.
Pahimangno sa katawhan ilabi na karong ting-ulan nga likayan ang paghumol sa tiil sab aha ilabi na kon adunay samad.
Kung ugaling dili gayud malikayan ang pagtabok sa tubig-baha kinahanglan nga mo-adto gyud dayon sa pinakaduol nga Health Center aron sa pagpangayo og tambal nga doxycycline Hyclate.
Gidid-an sa pag-inom sa maong tambal ang buros ug nagpasuso nga inahan, nag-edad og 12 anyos paubaos, walay sulod ang tiyan o gutom, hubakon, dunay allergy sa Tetracyclines, gatumar ug tambal pang seizure, pagpanglasyaw sa dugo sama sa warfain, coumadin ug jantoven.