GIPASABOT ni Gilas Pilipinas coach Chot Reyes nga iyang girespeto ang silot nga iyang nadawat gikan sa FIBA apan iyang giinsister nga wala siya’y gihimo aron moulbo ang kapungot sa iyang mga magduduwa atol sa karambola nga nahitabo tali sa Gilas Pilipinas ug Australia Boomers niadtong Hulyo 2 sa Philippine Arena sa Bocaue, Bulacan.
Si Reyes gipahamtangan og usa ka duwa nga suspensyon sa FIBA ug gipamulta kini’g 10,000 Swiss francs o mga P535,000.
Moepekto ang suspensyon ni Reyes sa unang adlaw sa 2nd round sa FIBA World Cup Asian Qualifiers batok Iran karong Septiyembre 13.
“The SBP has released its statement on the FIBA decision, and I stand with our national federation in respecting FIBA’s findings,” pamahayag ni Reyes sa interbyu sa website Spin.ph.
Nakuhaan si Reyes og video atol sa usa ka timeout sa wala pa nahitabo ang kagubot nga misulsol sa iyang mga magduduwa nga dapatan ang kaatbang nga mga magduduwa.
Apan gipasabot ni Reyes nga tipik lang kini sa iyang pinulongan sa basketball ug wala siya nimando niini.
“I have never given instructions to hurt nor incite unsportsmanlike behavior,” dugang pasabot ni Reyes.
“In my 20 years as head coach in the PBA and seven years at the helm of Gilas, I have never been involved in any such incident.”
Nangayo og pasaylo si Reyes sa nahitabo. (ESL)