MAHIMO na’ng free agent si Carmelo Anthony human nahan-ay ang three-team trade sa National Basketball Association (NBA) nga naglambigit sa Oklahoma City Thunder, Atlanta Hawks ug Philadelphia 76ers.
Ang 34 anyos nga beterano, three-time Olympic champion ug 10-time NBA All-Star bayaran sa nahabilin sa iyang kontrata sa Thunder nga nagbalor og $27.9 million ug aduna na unya kini kagawasan nga moduwa sa bisan unsang team.
Gikataho nga ang Houston Rockets maoy labing pursigido nga mokuha kang Anthony.
Ning maong kasabutan, ang Thunder mobuhi ni Anthony ug 2022 first-round NBA Draft pick ngadto sa Atlanta aron ibaylo nila ni German guard Dennis Schroder ug forward Mike Muscala.
Human niini, paliton sa Hawks ang nahabilin sa kontrata ni Anthony dayon ilaha kining buhian, usa ka lakang nga makapaluag sa ilang salary cap.
Gikan sa Thunder, si Muscala mabalhin sa 76ers unya ihatag sa Philadelphia si forward Justin Anderson ngadto sa Atlanta ug French swingman Timothe Luwawu-Cabarrot ngadto sa Oklahoma City.
Nahitabo kining maong kasabutan gumikan kay nakadesisyon untang gamiton ni Anthony ang iyang opsyon nga magpabilin sa Oklahoma City apan nakadesisyon ang Thunder nga buhian na ang 15 ka mga tuig nga beterano aron makapaluag sa ilang sa salary cap.
Sa miaging season, si Anthony mitali og career-low nga 16.2 puntos ug 5.8 rebounds nga averages ubos sa Oklahoma City diin katambayayong niya ang laing All-Star players nga sila si Paul George ug 2017 NBA MVP Russell Westbrook.
Kon madayon si Anthony sa Rockets, hayan laing duha ka All-Stars ang iyang ikauban nga sila si Chris Paul ug James Harden.
Sa pagpangulo nila ni Paul ug Harden, ang Rockets nakapugos og deciding Game 7 una sila miyukbo sa Western Conference finals series sa miaging season. (AP)