MOKABAT ngadto sa P1.8 milyones nga tabang-pinansyal ang gi-apod-apod sa Mandaue City Social Welfare Services Office (CSWS) sa mga benepisaryo sa City Cultural and Sports Complex kagahapon sa buntag.
Moabot ngadto sa 300 ka mga benepisaryo gikan sa 27 ka mga barangay ang nakapahimos sa maong programa sa maong buhatan sa city hall.
Matod ni Jessie Perez, pangulo sa CSWS nga sagad sa mga benepisaryo, nagpatabang sa CSWS sa ilang mga medical, burial assistance, bayranan sa ospital, laboratory, maintenance, tambal ug uban pa.
Lakip sa nakadawat og tabang ang mga tinun-an sa college nga P3,000 nga educational assistance.
Ang nakadawat og hinabang gipaubos sa makuti nga pagsusi, matod ni Perez. (JPP)