SUGDAN na sa pagbansay sa Traffic Enforcement Agency of Mandaue (TEAM) ang mga tanod aron kini maoy mobantay ug mopatuman sa balaod trapiko sa ilang mga barangay.
Kini maoy gibutyag ni Glenn Antigua sa dihang nahinabi sa Superbalita Cebu kagahapon.
Karong adlawa, tagduha ka mga tanod nga nirepresentar sa ilang mga barangay ang bansayon sa TEAM sud sa duha ka adlaw didto sa Alta Vista Resort didto sa lungsod sa Cordova.
Ang pagbansay sa mga tanod gikatakdang mahuman ugmang adlawa.
“Human sa training, ato sila i-deputize niya pwede na sila maka-isyu og citation ticket. Maoy gusto ni Mayor Quisumbing nga ma-deputize sila then maka-isyu og citation ticket para maka-enforce sila sa traffic laws sa ilang mga barangay,” matod ni Antigua ning mantalaan.
Paambit niya nga sa pagbansay, tudluan ang mga tanod og traffic direction and control, unsaon pagmaneho sa traffic, unsaon pagdakop sa molapas og traffic, basic traffic rules, mga city ordinances ug uban pa mahitungod sa trapiko.
Gitataw ni Antigua nga tagduha una ilang bansayon nga mga tanod gikan sa 27 ka barangay hangtod nga mahuman nila og bansay ang tanang mga tanod.
Dugang niya nga karon nga nahuman na ang barangay election ug adunay mga nailisan na nga opisyal, daghang mga tanod niadto ang nataktak sab sa ilang serbisyo ilabi na niadtong bag-o ang mga kapitan.
“Gipadad-an nato og suwat for training sa traffic direction and control and traffic management ang matag barangay,” dugang ni Antigua.
Nanghinaot si Antigua nga makatabang sa pagpatuman sa balaod trapiko sa barangay ang mga tanod sanglit ang mga enforcer sa TEAM nadestino man sa mga dagkong dalan sa dakbayan.
Sunod semana, ang TEAM gikatakdang mo-turn over sab og tagtulo ka radio sa tanang barangay, mga kapin 80 ka radyo sa kapulisan, ug napulo sa fire department.
“Dako kaayo siya og tabang kay ma-integrate nan a nato tanan sa Command Center. In terms of emergency dali nalang kaayo sila makatawag sa PNP and other concerned agencies aron dali na ang pagresponde,” matod ni Antigua.
Ang turn-over gikatakdang mahitabo sa City Cultural and Sports Complex ug sa maong kalihukan, tudluan sa supplier ug paggamit sa radyo. (JPP)