SEAMAN nga mobiyahe na unta sa America ang nasangit sa tugpahanan sa Mactan sa dihang nakuhaan og drug paraphernalias diha sa iyang bagahe.
Nabiyaan sa abyon si Jonathan Sanoy, 36, taga-lungsod sa Dalaguete, Cebu human siya gitanggong sa mga sakop sa Aviation Security Unit (Avseu) 7 ug Philippine Drug Enforcement Agency (PDEA) sa dihang adunay nakita sa X-ray machine nga kadudahang butang sud sa iyang luggage, kagahapon sa 6:58 sa buntag.
Base sa inisyal nga inpormasyon sa Avseu nga maoy first responder nga mihimakak ang maong pasahero nga nagdala siya og lighter.
Hinungdan nga napugos ang kapulisan sa paghiling sa iyang bagahe og nakuha ang kolor green nga lighter nga giputos og packaging tape kuyog sa glass water pipe o tooter, matod ni Leai Albiar, tigpamaba sa PDEA7.
Mobiya unta sa 8:00 kagahapon sa buntag ang maong pasahero kinsa usa ka crew sa cruise ship.
Gikatakda nga mobalik sa iyang trabaho si Sanoy sakay sa abyon paingon sa Seattle, Washington, USA via Narita, Japan.
Nasayran nga ang maong pasahero minyo ug adunay duha ka mga anak ug sud na sa tulo ka buwan nga nagbakasyon sa ilang dapit.
Sa imbestigason sa Avseu hugtanon nga gihimakak ni Sanoy nga iya ang maong butang ug sayod siya sa kahigpit sa seguridad sa airport. (FVQ)