GIPASALIG sa taas nga opisyal sa Department of Public Works and Highways (DPWH) nga way karsada nga masirad-an sa United Nations (UN) Avenue sa siyudad sa Mandaue sa higayon nga sugdan na ang pagtukod sa underpass.
“We are not reducing any lanes. We will not hamper, not reduce any traffic flow in the area,” pasalig ni DPWH 7 regional director Ador Canlas atol sa stakeholders’ meeting niadtong Huwebes sa ilang rehiyonal nga buhatan nga gitambungan sa mga representante sa mga local government unit, patigayon, ug ubang mga sektor.
Gibutyag niya nga karong Lunes, technically sugdan na nila ang stage 1 sa P711.9 milyones nga proyekto pinaagi sa paghawan sa dapit, pag-mobilize sa ekipo ug pagkural sa lugar.
Sa maong adlaw, himuon usab sa Visayan Electric Company (Veco) ang pagbalhin sa mga poste nga maapektuhan sa proyekto ngadto sa utility corridor nga gitagana alang sa mga utility firms nga naglakip sa Globe, Smart ug ubang pa.
Matod ni Canlas, nisaad si Veco chief operating officer Anton Perdices nga sa Hulyo 23 ang pagbalhin sa mga poste.
Gipaneguro sa regional director nga maghimo sila og duha ka lanes sa matag side nga magsilbi nga detour o service roads sa dili pa sila maglungag alang na sa paghimo sa depressed structure.
Nagpadayon na ang ilang pakigsabot sa mga pamilya kansang luna gamiton alang sa pagpalapad sa karsada.
Gitug-an ni Atty. Jerone Castillo, miyembro sa Right-of-Way Task Force sa DPWH 7, nga karong sunod semana mogawas ang appraisal report sa independent appraiser nga ilang gi-hire alang sa mga luna nga paliton nga mahimong kabahin sa proyekto.
Moabot sa 952 metros ang kinatibuk-ang gitas-on sa proyekto, ug 680 metros ang alang sa underpass nga magsugod sa dili pa moabot sa Flying V hangtod sa dili pa ang Wilcon sa U.N. Avenue.
Giklaro ni Canlas nga bisan kon 910 ka mga adlaw ang duration sa proyekto, apan nasugdan na kini niadtong Disyembre sa miaging tuig pinaagi sa desinyo nga gihimo sa contractor, ang B.M. Marketing nga nagbase sa Leyte nga gi-review ug giaprobahan sa DPWH. (SCG)