SECTIONS
Wednesday August 15, 2018
SUPERBALITA CEBU

Pulis blangko; Garma may warning ni Lozano

Sayop. Dunay sayop ang caption ning mao nga hulagway nga napatik ning mantalaan kagahapon. Ang mitago ilawom ning mao nga katre sa tunghaan sa Labangon mao si kanhi SPO2 Armando "Ahmed" Lozano, di si Ahmed Cuizon, regional director sa Land Transportation Franchising and Regulatory Board (LTFRB) 7. Wa tuyoa ang sayop ug wa gitumong aron pagpakauwaw kang Cuizon ug sa iyang pamilya. (Editor)

PERSONAL ug may kalabutan sa iyang kanhi trabaho isip pulis gitan-aw nga motibo sa pagpusil ni kanhi SPO2 Armando Ahmed Lozano sa sulod sa Labangon Bliss Elementary School niadtong Huwebes sa hapon.

Apan ang hepe sa kapulisan sa dakbayan sa Sugbo dunay pahimangno kang Lozano.

Matod ni Chief Inspector Clark Arriola, hepe sa Punta Princesa police station, nga ila pang gisubay ang mga Close Circuit Television CCTV sa dapit diin nahitabo ang pagpamusil.

Usa sa ilang gitinguha nga makakuha silag CCTV video sa pag gawas na niini sa tunghaan nga wala na mag sul-ob sa bonnet.

Sa inisyal nga imbestigasyon nga ilang nasayran gikan sa mga pamahayag sa mga saksi, naa na daan sa sulod sa compound sa eskwelahan ang duha ka mga gunman sa wa pa maabot si Lozano.

Posibling nagpaabot lang kanus-a maka higayon sa ilang pagpamusil ug sila nagduda nga sa pagsulod niini sa eskwelahan wa kini magtaptap.

“Naa na gyud ni sila daan sa sulod kay kon nag bonnet ni sila sa pagsulod, matingala ang mga tawo didto. So, mabantayan na sila,” matod ni Arriola.

Si Lozano nakaeskapo human makadagan ug makatago sa usa ka lawak sulod sa tunghaan ug nalipat ang gunman nga migukod kaniya.

Naa siya sa usa ka pribadong tambalanan nagpaalim sa iyang mga samad sa bukton ug tiyan.

Ang hepe sa Cebu City Police Office, Senior Superintendent Royina Garma nihatag lang unag panahon sa Punta Princesa police station sa pagsusi sa insidente.

Drugas?

Dako hinuon ang iyang pagduda nga may labot ang suway nga pagpatay kang Lozano sa mga kaso nga iyang giatubang sa dihang aktibo pa siya sa serbisyo.

Nakadawat og impormasyon si Garma nga nalambigit sa illegal nga drugas si Lozano, apan wa pa siyay gihuptan nga ebedensya sa pagkakaron.

Tungod niining nahitabo, dunay tambag ang babayeng city director kang Lozano.

“Kung ako siya at alam niya involve siya sa drugs, eh tumigil siya. He has to stop and leave the city,” matod ni Garma.

Ila usab nga gisubay kung unsa ka tinuod nga kanhi body guard si Lozano ni Peter Lim, ang Sugboanong negosyante nga ginganlan ni President Rodrigo Duterte nga nalambigit sa illegal nga drugas.

Stress debriefing

Lima ka guidance counselors ang mopahigayon og stress debriefing ug counseling sa 70 ka mga tinun-an sa Grade 2 sa mao nga tunghaan.

Ang mao nga mga tinun-an nakakita sa pagpusil kang Lozano.

Matod sa principal sa tunghaan, Ricardo Aman, iyang gidasig ang mga ginikanan nga papadayunon ang ilang mga anak pagtungha.

Kini human ang mga ginikanan nangabalaka sa kaluwasan sa ilang mga anak human sa pagpamusil.

Samtang si Labangon Barangay Captain Vic Buendia niingon nga mopakatap sila og dugang mga barangay tanod sa Labangon Bliss Elementary School.

Apan di siya makaseguro nga ang presensya sa dugang mga tanod makapaislag sa mga kriminal kay sa iyang tan-aw, wa na kini kahadlok.

Atol sa hitabo, sila si Cebu City Councilors Eugenio Gabuya ug Joy Augustus Young, chairman sa committee on education sa Konseho, diha.

Matod ni Gabuya nga giimbetar sila ni Lozano alang sa induction sa Parent Teachers Association (PTA), ang nauwahi maoy presidente.

Si Gabuya niingon nga nakiglamano pa siya kang Lozano sa wa pusila sa gunman. (Dugang taho nila ni JOB, RVC sa Sunstar Cebu)


VIEW COMMENTS