PATAY ang usa ka 17 anyos nga lalake human girakrakan sa wa pa mailhing suspek samtang nagduwa didto sa may G. Ouano St., Brgy. Opao, dakbayan sa Mandaue, Sabado sa kadlawon, Hulyo 21.
Nakaangkon og daghang samad-pinusilan ang biktima nga si Syle Cantillep ilabi na sa iyang dughan atol sa insidente mga 1:20 sa kaadlawon.
Matod ni Senior Inspector James Conaco sa Station 5 sa Mandaue City Police Office (MCPO) nga base sa ilang imbestigasyon nga ang biktima nga taga- Purok Rose sa dapit nagduwa pa og buwan-buwan uban iyang mga higala sa wa pa ang insidente.
Sigon ni Conaco nga duha ka mga lalake nga sakay sa motor nga way plate number ang nikalit og abot sa G. Ouano St.
Ang back rider matod pa nibunlot sa iyang armas ug nirakrak ni Cantillep.
Nahagba ang biktima sa yuta samtang naligo sa kaugalingon niining dugo.
Ang mga suspek daling nisibat palayo sa dapit.
Ang mga residente duol sa crime scene daling nanawag sa kapulisan ug ang pulis nagpatabang sa mga sakop sa Emergency Rescue Unit Foundation (ERUF).
Paambit pa ni Conaco nga gisuwayan pa og tabang sa ERUF ang biktima apan wa na gyud kini ma-revive.
Unom ka mga kabhang sa .45 kalibre nga armas ang narekober sa crime scene.
Padayon pa sab nga gitino sa kapulisan ang motibo sa pagpamusil.
Dumot o gang war mao usa sa mga gitan-aw nga motibo karon sa kapulisan. Nahibaw-an sa imbestigasyon nga miyembro sa Ahkro ang biktima.
Ipaubos pa usab og dugang follow up ang kamatayon sa minor de edad.
Sa laing bahin, usa ka 27 anyos nga lalake ang gipusil sa kainom niini sa Brgy. Tawason, Mandaue niadtong Biyernes sa gabie,
Naigo sa dughan si Rocky Custiniani, 27, human gipusil ni Al Tango kinsa daling nisibat human sa insidente mga alas 8:45 sa gabie.
Matod sa Station 6 sa MCPO nga ang biktima ug suspek parehong hubog ug nagkabikil human naglinabayay og sakit nga pulong.
Daling gidala sa North General Hospital si Custiniani sa Talamban, dakbayan sa Sugbo ug gibalhin dayon sa Vicente Sotto Memorial Medical Center alang sa operasyon,
Padayong gipangita pa sab sa kapulisan si Tango kinsa kasamtangang nagtagotago.