Binasi sa Jeremias 23:1-6; Salmo 23; Taga Efeso 2:13-18; Marcos 6:30-34
MATAG usa tingali nato nakaagi na og kalandrakas. Kon may kalandrakas wala magkadimao. May mga panghitabo nga wala kitay pagdumala apan apektado ta. Ang mga galihok unta, mihunong og lihok. Mahimong may kalandrakas kon wala nato buhata ang angayng buhaton. Nagtipun-og kini ug miabot ang yugto nga mibuhagay ang mga buhatonon. Apan may kalandrakas usab nga katilingbanon. Mga butang nga wala damha ug wala pangandami sa usa ka hugpong o katilingban. Mibuhagay kining tanan ug wala na magkadimao.
Padulong na sa kalandrakas ang nasaksihan ni Jesus: “Ug sa iyang pagkawas nakita niya ang dakong panon sa katawhan ug naluoy siya kanila kay sama sila sa mga karnero nga walay magbalantay.” Mingsubwak man god ang buot moduol sa pundok ni Jesus: “Apan daghan ang nakakita kanila nga namiya ug nakaila kanila ug gikan sa mga kalungsoran nanagan sila nga nagtiniil paingon didto ug nauna pa gani sila pag-abot kanila.” Pagkakita ni Jesus kanila “misugod siya pagtudlo kanila sa daghang mga butang.”
Kini diayng pagtudlo tambal sa umaabot o nagsingabot nga kalandrakas. Daghang kalandrakas man god nagasugod sa hunahuna sa tawo. Tungod sa ignoransya daghang maangin. Tungod sa hiwi nga panghunahuna, maapektohan ang uban. Tungod sa kakulangan sa kahibalo, daghan ang masayop. Bisag ang relasyon nato sa Dios ug sa usag-usa apektado tungod sa kakulangan sa kahibalo. Mao nga nagtudlo usa si Jesus.
Nagkalandrakas ang katawhan sa Dios tungod kay wala sila ayoha og bantay sa mga magbalantay. Mao nga napuno sila og kahadlok. Sumala ni Jeremias, ang Ginoo na mismo ang mopundok kanila pag-usab ug siya na mismo ang mopili og mga magbalantay nga mobantay gayod kanila. Kini diayng kalandrakas bunga usa sa mga lider nga wala mobuhat sa katungdanan.
Si Jesus nga Maayong Magbalantay maoy mopahiuli kanila nga nagkatibulaag. Gihimo niya kini pinaagi sa pag-ula sa iyang dugo. Diha sa krus, gilaglag niya ang panagbangi. Gihimo niyang usa ka katawhan ang mga Judio ug pagano. Gisangyaw nila ang kalinaw bisan ngadto sa mga umaabot pa ug kanila nga dinhi na. Sa ato pa, kitang tanan.
Walay dag-anan ang kalandrakas kang Jesus. Walay dag-anan ang kalandrakas kanila nga mingtuo kang Jesus. Taliwala sa mga pagsulay ug daghang mga hagit, mokupot kita kang Jesus aron dili kita matay-og, bisan pag nagkalisodlisod kita.
Giunsa man nato pagbuntog sa kalandrakas tinabangan ni Jesus?