KALIT lang nga nitumaw kini si Kapitan Niña Mabatid isip contender alang sa pagka presidente sa Association of Barangay Councils (ABC) sa Syudad sa Sugbo human sa piliay sa barangay sa miaging Mayo 14, 2018.
Kini dihang natino nga walay dag-anan ang kandidato sa Barug Team Rama nga si Philip Zafra.
Kay bisan pa man og mahimong konsehal si Erik Espina isip alang-alang nga hulip kang James Cuenco, sayang lang ang maong paninguha kon di makuha sa oposisyon ang ABC.
Tan-awa gud ang tapad-tapad sa Konseho sa Syudad sa Sugbo karong nakalingkod na si Konsehal Espina, siyam-siyam gihapon. Mayoriya man tuod ang oposisyon kon mobotar si Bise Mayor Edgar Labella aron mabuak ang tabla, mapapas lang kini gihapon kon si Kapitan Franklyn Ong ang molingkod isip ABC president ug ex-officio councilor.
Nitumaw dayon ang ngalan ni Mabatid isip kandidato sa PDP-Laban alang sa pagka president sa ABC. Basi kini sa pagtuo nga makapahak si Mabatid sa BOPK aron madugang sa Team Rama ni Zafra.
Dinhing tungora, ato nang nadunggan ang istorya nga ang Malakanyang niimbitar kang Mabatid nga maoy mag presidente sa ABC.
Ngilngiga gyud. Sa tanang mga syudad ug lungsod sa tibuok nasud, si Mabatid lang ang gi-endorso ni Presidente Rodrigo Duterte?
Apan nahibulong kita nga wala may opisyal nga anunsyo ang Office of the Presidential Assistant for Visayas (OPAV) kabahin sa maong kalambu-an. Abtik baya kaayo kini ang OPAV nga moangkon og mga kalambu-an nga nalambigit ang presidential office ug lakip na ang mga Gabinete.
Unya, walay bisan unsang hulagway diha sa social media nga nagpakitang opisyal nga giindorso si Mabatid.
Di man konektado sa Malakanyang ang opisyal nga naghimo kaniyang consultant sa OFW.
Di sab tungod sa Malakanyang kadtong tigum tali sa pipila ka barangay kapitan ug kang Sec. Manny Piñol. Dako ang akong pagtuo nga tungod kadto sa giangkon nga bana ni Mabatid nga si Ramon Floresta, kadtong tigulang nga negusyanteng nakita nga nanumbag og sikyo ug naniko og babaye nga manager sa CCTV sa Waterfront Hotel.
Sa laing bahin, naa kitay presidente nga masuko kon gamiton ang iyang ngalan, sa iyang pamilya, o ang Malakanyang.
Kahinumdoman, usa ka assistant secretary sa Department of Transportation (DOTr) ang gitaktak ni Presidente Duterte nga nag-namedrop sa ngalan sa first family.
Samot pa kaha kining usa ka opisyal nga nalambigit niining makauulaw nga insidente diha sa usa ka hotel ug tungod niini nag-atubang na og kaso sa buhatan sa Office of the Visayas Ombudsman.
Mao nga dako ang akong pagtuo nga dili tinuod ug pangatik lang gyud kining pamahayag ni Kapitana Mabatid nga siya giendorso sa Malakanyang.
(@anol_cebu sa Twitter)