Nalzaro: Attention LTO

ANIA kitay nadawat nga lehitimong reklamo gikan sa atong suki nga si Jose Arcillas sa Mabolo. Hinaot nga ma-aksiyonan kini sa Land Transportation Office (LTO 7).

‘Maayong adlaw kanimo Super Bob. Nagsuwat ko kanimo kay namasin ko nga mapaminaw sa kadagkoan LTO nga mas nindot gyud nga ang satellite office diha sa Robinson’s Fuente, hatagan nila og pagtagad. Mga duha ka buwan na nga ang LTO nagbutang og Temporary Off-Site Printing Office nga gitawag nila og TOPO diha sa SM Seaside. Ang tumong niini aron makaimprinta sa mga plastic nga driver’s license.’

‘Kadtong molukat og lisensya sa Robinson’s Fuente, paadtuon pa nila sa SM Seaside aron pakuhaon sa ilang plastic license? Akong nahibaw-an nga bisan pa og moadto ka karon sa SM Seaside ug wala ka’y kaila sa mga kawani sa LTO, dili ka gihapon maisyuhan og plastic driver’s license. Igo ka lang nga hatagan nila og petsa, nga dugay pa kaayo, aron mobalik ka sa SM Seaside ug kaisyuhan sa plastic driver’s license.’

‘Nganong dili na man lang anha ibutang ang kahimanan sa LTO nga makaimprinta og plastic driver’s license sa LTO Satellite office sa Robinsons Fuente aron nga ang mga molukat diha og lisensya dili na mahasol? Pagka karon, dali ra kaayo ang pag-isyu og lisensya sa LTO sa Robinson’s Fuente, apan dili kini makaisyu og plastic. Para kanako, mas nindot gyud nga imbes sa SM Seaside ibutang ang maong kahimanan, anha na lang unta sa Robinson’s Fuente.’

‘Mora na man hinoon og gihasol sa LTO ang katawhan nga molukat og lisensya niining ilang pamaagi. Moingon ang kadagkoan sa LTO nga wala pa kuno mahitsas ang mga koneksyon sa Robinson’s Fuente aron makabutang nianang ilang kahimanan nga makaimprinta og plastic nga lisensya, apan kon ang tagdumala sa LTO sa Robinsons ang pangutan-on, dugay ra kuno kini nga andam. Naglibog na gyud ko niini kon ngano nga mora na man hinuon og gi-discriminate sa kadagkoan sa LTO ang ilang satellite office sa Robinsons Fuente.’

Mahimo man nga balhinon nila ang kahimanan nga gibutang nila sa SM Seaside ngadto sa Robinsons, gawas lang kon may kasabotan sila nga wa kita masayod.’ (bobbygnalzaro@gmail.com)