UBAY-UBAY ka mga basura ang natigom sa mga tinugyanan sa City Local Environment and Natural Resources Office (Clenro) sa gipahigayong plogging o pagpamunit og basura samtang nag-jogging niadtong Hulyo 20, 2018.
Tumong ug tuyo sa maong kalihokan ang pagpanglimpyo sa kadalanan tungod sa mga basura nga gipanglabay daplin sa dalan.
Matud ni Engr. Armen Cuenca sa Clenro nga dungan sa pagpasingot sa pag-jogging ila kining gisagulan og pagpamunit og basura.
Ang maong kaluhakan gilangkuban sa mga empleyado ug pipila ka mga estudyante.
Ang ilang kalihukan dili lang pudyot usa usab kini ka educational campaign tungod kay kon adunay malabyan nga naglabay og basura ila kining pahinumdoman sa insaktong labayanan og basura aron dili kini magtapok sa kanal kon moulan.
Sa nahipos nga impormasiyon, gikabutyag nga mokabat sa 47.7 ka kilo ang mga basura nga natigom atol sa maong kalihokan sama na lamang sa mga botelya, plastik, lata ug mga upos sa sigarilyo.
Giingong pagahimuon kini matag unang Biyernes ug Miyerkules kada bulan aron usab nga maanam sa pagkuha ang mga plastic ug uban nga mga basura nga maoy makabara sa mga kanal ug hinungdan sa pagbaha panahon sa ting-ulan.