USA ka babaye nga dunay dakong kantidad sa bulsa ang napalgang patay niadtong Hulyo 20 sa pinyahan nga bahin sa Brgy. Sangcanan, lungsod sa Manolo Fortich, Bukidnon.
Sa inisyal nga imbestigasyon sa Manolo Fortich Police Station, nasuta nga ang biktima anaa na sa pagkadugta, nag sul-ob ug pantalon ug t-shirt ug adunay P35,000 sa iyang bulsa sa pantalon ug wala nay lain pang identipikasyon.
Ang kagawad sa dapit nga si Ariel Heneses namahayag nga usa ka Jojo Empasis nga tapasero ang nakakita sa biktima nga wala nay kinabuhi samtang nanglampas sa dapit.
Giingong dili kini residente sa dapit kay bisan usa walay nakaila sa biktima.
Gidala na ang pata’yng lawas sa punerarya sa naasoy’ng barangay samtang nanawagan ang kapolisan nga kung duna mangita niini makigkoordinar sa ilang buhatan.