ANG general manager sa Toronto Raptors nangayo og despensa ngadto sa ilang kanhi resident star nga si DeMar DeRozan human kini iyang gipasaligan nga dili ma-trade sa laing team.
Si DeRozan, Jakob Poeltl ug ilang 2019 first-round pick gi-trade sa Raptors ngadto sa San Antonio Spurs bugti ni Kawhi Leonard ug Danny Green nga nakapakurat sa NBA world.
Base sa taho, usa ka miscommunciation ang nahitabo tali ni GM Masai Ujiri ug ni DeRozan hinungdan nga nahitabo ang panagbayloay og players.
Gidayeg sa GM sa Raptors ang ilang kanhi Star nga karon mopaingon sa San Antonio human sa iyang 9 ka tuig nga pagserbisyo sa usa sa malambuon nga siyudad sa Canada.
“I want to not only apologize to DeMar DeRozan for maybe a gap of miscommunication, but also to acknowledge him and what he’s done here with the Raptors, for this city, for this country. There’s no measure to what this kid has done,” matod ni Ujiri.
Usa sa nasuk-an ni DeRozan mao nga nagtagbo pa sila didto sa Las Vegas atol sa summer league ug giingnan siya nga magpabilin siya sa Raptors.
Apan base sa report, human sa ilang panag-estorya didto sa Vegas, ang Toronto anaa sa ikaupat nga team nga maoy posibleng balhinan ni Leonard kinsa gusto nga mobiya sa Spurs.
Sa Instagram post ni DeRozan, iyang gipadayag nga gisultian siya nga “ told one thing and the outcome another" ug “ ain’t no loyalty in this game”.
Si Ujiri nihulagway kang DeMar nga maoy greatest player nga niduwa sa Raptors sa iyang panahon ug iyang himuon kutob sa iyang mahimo nga mahatagan og tribute ang ilang kanhi pambato.
Niduwa si DeRozan sa Raptors sukad niadtong 2009 diin siya maoy ika-9 nga draft pick sa NBA ug siya maoy responsabli nganong nakakulit og kasaysayan ang Raptors sa ilang prangkisa diin ilang nahimo ang 59-23- win-lose record sa niaging season.
Championship
Nanghinaot si Ujiri nga moresulta ngadto sa kampyonato ang iyang labing dako nga lakang pag-trade sa ilang all star nga si DeRozan aron makuha ang serbisyo ni Leonard.
Si Ujiri niatubang sa mga tigbalita didto sa Toronto human sa blockbuster trade diin iyang giputol ang siyam ka tuig nilang panag-uban sa ilang labing sinaligan nga player.
“On paper we feel we have a team that can compete in the East and hopefully to compete for a championship in this league,” padayag ni Ujiri.
“At this point, we got to the level where this opportunity came to us, and we had to jump on it,” dugang niya.
Si Leonard wala atol sa gipahigayon nga news conference apan ila nang nakita ang medical reports bahin sa kanhi pambato sa Spurs.
Ang all star forward nga si Leonard adunay right quadriceps injury diin igo lang siyang nakaapil sa 9 ka duwa sa niaging season. (HBL)