Erlando Ligan Majan
Hipodromo, Cebu City
WALA makasabot si Efren sa iyang kaugalingon. Ingon sa nangimugkimog ang iyang kaunoran ug nagmadukuton ang iyang panan-aw sa mga butang nga iyang gikaibgan. May moisa sa iyang mga kamot nga mokawhat sa usa ka kuwentas nga nabugto ug nagkaabog sa aseras nga iyang gilaktan sa hilom. Gabii na. Halawom nga gabii sa nagmingaw nga palibot sa dakbayan.
Milingi-lingi siya. Ang nalantaw ug nakita lamang niya mao ang mga makililimos nga nangatulog sa mga suok sa aseras. Abtik ang iyang kamot nga mikawhat ug mipunit sa kuwentas sa kongkretong aping sa aseras. May mikidlap sa iyang panan-aw. Migilaw ang kuwentas nga gibag-id niya sa kilid sa iyang pantalon. Bulawan! May linging medalyon nga gipuntikan sa duha ka diyamante.
“Gisuwerte ko ning gabiona!” nagpanglitik siya sa iyang tudlo ug kasinggiton siya. Daw dili siya makatuo sa iyang nakaplagan. “Wala na kinahanglana nga mangawat ko. Naka-dyakpat ko. Di na ko mamugaw sa mga burikat dinhi sa kadalanan..”
Mobiya na unta si Efren apan may misangpit sa iyang luyo. Wala siya molingi. Gidali niya pagluklok ang kuwentas sa likod nga bulsa sa iyang pantalon. Bayot ang misangpit kaniya. Hamtong nga bayot nga may dalang pistola. Nanlimbawot ang iyaag mga balhibo.
“Hoy, Dong! Unsay gitagoan mo sa imong bulsa?” Ingon sa namatikdan siya sa bayot. “Pakit-a ra god ko. Nahagtos man ang kuwentas sa akong liog. Napunitan mo ba?”
Naamang si Efren sa makadiyot. Nagsukot siya sa kaugalingon, ‘Gilaang ba ako? Animal ning bayuta!’ “Unsay tuyo?” ni Efren ngadto sa bayot.
“Kon kuwentas ang napunitan mo, iuli kana ngari nako. Kay kon dili, kining pistola ko maoy mopahibawo nimo.”
Sa kalisang ni Efren gikuot niya ang kuwentas gikan sa iyang bulsa ug gitunol dayon sa kamot sa bayot.
Mikatawa ang bayot. “Nakagusto ka diay sa kuwentas? Pareho diay ta. May mga kamot nga kiriwan!”
Nahiuknol si Efren, “Kinawat na nimo?”
Nasuko ang bayot, “Hilom diha! Mosibat na ko. Di na ko maglangay pa nimo. Maayo nga nasubay ko pagbalik diin ko nabiyaan ang kuwentas sa pagdinali ko, ug napunitan mo. Ari na ko, my darling! Tenk you!”
Kalit lang nahanaw ang bayot,sa panan-aw ni Efren. Nagpanglingo siya, “Kawalay suwerte nako!”
Halawom na ang kagabhion. May patrol car sa kapulisan ug usa ka sinaw ug mahalong awto mihunong sa iyang kilid.
May tiguwang babaye nga mestisa Katsila misukot kaniya, “Dong, may bayot ba’ng nahiagi dinhi?”
“Oo, Ma’m. Ngano man?” tubag ni Efren.
“Katabang ko to siya, Apan dakong kawatan!”
Gitudlo ni Efren diin paingon ang bayot. ‘Patay kang bayuta ka!’ ni Efren sa hilom samtang nagpahiyom. (Katapusan)