ANG lakaw underestimated nga exercise. Mao usab ni ang labing sayon sa tanan kay mahimo ni ni bisan kinsa. Low impact sab ni nga ehersisyo, apan calorie burner. Sa usa ka oras diay nga paglakaw nga ordinaryo lang, mosunog kini og 120 ka calories.
Mosamot ka taas ang masunog nga calories kon paspasan ug mas grabe ang effort. Kon magtumong ka og 10,000 ka mga lakang kada adlaw ug di ka magpatakag kaon, mokanaug gani diay ang imong timbang. Wa na kinahanglana pa nga moapil ka og zumba.
Bisan mosuroy ka lang o molakaw ngadto sa dapit nga dunay kakahuyan o kon naa ka sa siyudad, mosubay ka sa mga aseras o sidewalk aron makakuha sa 10,000 challenge nga lakang kada adlaw, maayo kaayo ni. Mahimo kining himuon sa adlaw o sa gabii.
Apan matod sa mga pagtuon, mas maayo og resulta ang ehersisyo sa buntag kay sa gabii. Apan kon lisod sa buntag tungod sa kasayo momata unya gikinahanglan nga mosayo ka tungod sa traffic, mas maayong ari ka na sa hapon o gabii.
Niadtong duna pa koy biseklita diri sa silong sa Sunstar, dunay mga higayon nga sayo kong mahuman sa trabaho, makalugar ko sa pagsikad. Apan lahi na ang karon ug kaniadto mao naglisod na ko sa pagsikad sa gabii.
Mas maayo
Sa mga pagtuon, nakaplagan usab nga ang imong benipisyo nga nakuha sa pag ehersisyo, mahanaw ra paglabay sa tulo ngadto sa upat ka adlaw. Busa, mas maayo diay nga at least, every other day makapasingot ta aron naa kanunay ang benepisyo sa ehersisyo makuha. Kon di sa buntag, ari ka na sa sayong gabii o late sa hapon.
Mas maayong makaabot og usa ka oras kon lak-ang og usa ka adlaw ang pag-ehersisyo.
Kaniadto maihap lang ang mag-exercise. Apan karon sayo sa buntag daghan na kong nakit-an nga mag-exercise og sayo sa buntag, labina sa Sabado ug Dominggo. Hayan daghan na ang aware karon nga tungod sa di maayong gipangkaon, angay nang mag-exercise.
Lahi na
Bitaw, kaniadto wa pa ning mga fastfood, minos ang mga sakit sa cancer ug uban pang matang sa illness. Karong panahuna, bisan ang mga 20 anyos kapin duna nay gipamati sa lawas. Naa gani pipila ka mga kaso sa atake sa kasingkasing sa mga nag-edad og 20 anyos kapin.
Dihang magsakay pa kog PUJ magabii, nakasakay ko og mga call center workers. Ingon pa niya sa iyang estorya ngadto sa iyang mga amiga, 28 anyos pa siya. Apan nag-maintain na siya og tambal sa high blood.
Kini baya nga sakita, kasagaran, tungod sa lifestyle. Sa klase sa mga pagkaon karon, kuyaw na ang atong lawas. Mao lagi, gikinahanglan ang exercise. Pasingot gyud ta.