GITATAW ni Mandaue City Mayor Gabriel Luis "Luigi" Quisumbing nga adunay saktong koordinasyon ang Department of Public Works and Highways (DPWH) ug ang Traffic Enforcement Agency of Mandaue (Team) kalabot sa trapiko sa U.N. Avenue ilabi na nga sugdan na ang Phase 1 sa underpass project sa DPWH sa dapit karong Lunes.
Lakip sa Phase 1 sa P711.9 milyones nga proyekto mao ang paglimpyo kilid sa dapit ug pag-deploy sa heavy equipment.
Giangkon ni Quisumbing nga ang proyekto moresulta unya sa kahasol sa mga motorista.
“Mao lage na, ang TEAM enforcers and the DPWH are coordinating. We will try to soften the blow as much as possible and we are looking for alternative routes to utilize while the project is ongoing,” ni Quisumbing sa dihang nahinabi sa mga tigbalita.
Dugang niya nga dako unyang matampo sa pagpaluag sa trapiko ang underpass sa U.N. Avenue kon mahuman na kini.
“Kahibaw gyud mi nga adunay inconvenience sa part sa commuting public, but once the structure is finished. I am sure there will be more efficient traffic flow. Whether we like it or not, any infrastructure development is inconvenient. Panagsa ra gyud ta makahimo og project nga walay inconvenience sa public,” sigon pa sa mayor.
Sa dihang gikuhaan og habig ang pangulo sa TEAM nga si Glenn Antigua, kini niingon nga ang buhaton sa DPWH kay clearing operation una sa portion sa right of way nga paliton sa DPWH isip service road samtang trabahuon ang maong proyekto.
Padayag niya nga di ra maapektuhan ang dagan sa trapik sanglit sa kilid ra man sa U.N. Avenue motrabaho ang contractor sa DPWH.
Ilang limpyohan og tangtangon unya ang mga poste, kahoy uban na ang mga bahin sa mga establisamento niini.
Ang Visayan Electric Company (Veco) ang unang mobalhin sa mga poste ngadto sa dapit nga gitagana sa DPWH alang sa mga utility firm nga maapektuhan sa himuon nga underpass.
Apil sa hawanan ang mga punoan sa kahoy nga nagbarog daplin sa karsada nga makan-an sa gitinguha nga himuon nga service roads.
Ang DPWH mopahimo og tag duha ka lanes sa isig ka kilid aron dunay magamit ang mga motorista nga mopaingon sa siyudad sa Lapu-Lapu ug amihanang bahin sa higayon nga sugdan na ang pagtukod sa underpass.
Ang DPWH nipatawag na sab og stakeholders meeting alang sa apektadong mga establisamento sa dapit niadtong Huwebes, dugang ni Antigua. (JPP)