KAPITOLYO nagplano pagkiha sa municipal social welfare and development officer sa lungsod sa Daanbantayan human masuta nga dunay girekomendar nga tinun-an alang sa Paglaum Scholarship Program nga di tinuoray nga indigent o labing nanginahanglan.
Ang nakalusot nga tinun-an gitumbok sa rekomendasyon sa social welfare officer nga giabandonar sa amahan bisan og intact ang pamilya niini ug duna sab silay 6 ka units sa van-for-hire.
Gipadala ni Bise Gobernador Agnes Magpale ang usa ka team gikan sa Provincial Women’s Commission sa Daanbantayan aron pagsusi sa girekomendar.
Giila ni Magpale ang MSWD officer nga si Heidie Aplece, kinsa nagdumili sa pagtubag dihang kuhaan unta og pamahayag.
Sa wa pa napili ang mga scholar, gipang-screen na kining daan sa MSWDO sa nagkadaiyang lokalidad kay sila ang mas nakaila ug nahibawo sa background sa mga lumolupyo sa ilang tagsa-tagsa ka lugar.
Matod ni Magpale nga sa kapin 100 ka mga tinun-an nga girekomendar sa social welfare officer, 68 niini ang hingpit nga nalakip sa bag-ong scholars sa Kapitolyo karong tuiga ug entitled nga makadawat og P1,500 nga allowance matag buwan.
Niadtong Miyerkules, nakadawat og impormasyon ang bise gobernador nga usa sa mga scholar gikan sa Daanbantayan anak diay og v-hire operator ug gani duna silay unom ka mga unit.
Apan sa rekomendasyon nga gipadala sa MSWDO, gitumbok niini nga indigent ang maong tinun-an ug matod pa, gi-abandonar sa iyang amahan, apan di tinuod human sa ilang pakisusi.
Tungod niini, tinguha ni Magpale nga mapasakaan og kaso si Aplece nga may kalambigitan sa falsification of public documents.
Gisuwayan pagkuha ang habig ni Aplece, apan nagdumili siya pagtubag ug gitugyan kang kanhi mayor ug karon MSWDO consultant sa Daanbantayan, Maria Luisa Loot.
Matod ni Loot, wa giagi sa mayor sa lungsod ang pagpahibawo sa Kapitolyo nga may itanyag nga scholarship program alang sa mga indigent.
Ang napili ug girekomendar nga mga tinun-an sa Daanbantayan, gihulagway niya nga pagbuot sa mga konsehal sa lungsod, nga kaalyado ni Magpale sa Liberal Party (LP).
Sigon ni Loot, igo na lang sa pagpirma si Aplece sa ilang rekomendasyon kay maoy gihangyo sa mga konsehal ug taga Kapitolyo.
“Wala gani na nila giagi sa mayor. Dili man (makalihok ang ilang papeles sa scholarship) kon dili pirmahan sa MSWDO, ila ning gipakiusapan. Iyang gisugo ani iyang mga konsehal nga LP, mga Liberal. Gipamolitika ni nila,” niingon si Loot.
Giangkon ni Loot nga supporter niya ang ginikanan sa tinun-an nga nadiskubrehan nga dunay mga v-hire ug matod pa, gigamit ang scholarship aron paghaylo kanila nga mobali sa ilang suporta. Nasyaran gikan kang Bise Gob. Magpale nga boluntaryo nang ni-pullout sa Paglaum Scholarship Program nasakpan nila nga dili indigent. Gisusi na usab karon kon dunay susamang sitwasyon sa Daanbantayan ug uban pang LGU sa Sugbo. (AZLG)