LIBOAN ka mga butane canister ang nasakmit sa kapulisan sa Danao kagahapon human kini nasakpan nga naninda og gi-refill nga butane canister sa Sta. Cruz, Barangay Dunggoan, dakbayan sa Danao.
Ang nasikop naila nga si Julieto Mahilum, 37, kinsa residente ra usab sa maong dapit.
Nasikop kini kagahapon pasado alas 8 sa buntag human makadawat og tawag ang Danao City Police kabahin sa ilegal nga pagpamaligya niining refilled butane canisters ug mga produkto nga petrolyo.
Human makadawat og tawag ang duty desk officer nga si PO1 Gepsy Miro, dali kining nipadala og personnel aron moresponde aron ma-verify.
Inubanan sa Bureau of Fire Protection sa Danao City, nasakpan si Mahilum nga naninda og butane canister.
Gipangayuan kini og dokumento apan wala kini maipakita.
Giisip sa Department of Energy nga illegal kining pag-refill og butane canister tungod kay risgo kini gamiton.
Lakip sa nasakmit mao ang 40 litos nga gasolina.
Moabot sa 1,232 nga butance canisters diin kon susamahon ang duha, mokantidad kini og P16,984.
Kalapasan sa Presidential Decree 1865 ang atubangon ni Mahilum kinsa natanggong karon sa Danao City Police Station. (HBL)