GIDID-AN na ang mga trisikad sa paglabang sa SRP-Laray Road sugod kagahapong adlawa. Kini sa tinguha nga makalikay sa disgrasya diha sa maong dapit ug alang sa mas paspas nga pag-agi sa mga sakyanan.
Gitug-an sa focal person on traffic management sa Kapitolyo, Joy Tumulak, nga nauyunan ang maong lakang sa mga opisyal brgy. San Roque, Tangke ug Cansojong sa siyudad sa Talisay atol usab sa ilang tigum kauban ang Land Transportation Office ug Department of Public Works and Highways 7 niadtong Miyerkules.
Nakapaaghat niini ang insidente dili pa lang dugay, diin usa ka trisikad ang nadasmagan sa usa ka trak de karga nga nagsubay sa Cebu South Coastal Road.
Matod ni Tumulak, gawas nga dunay ordinansa sa Talisay nga nagdili sa mga tricycle ug mga trisikad diha sa national highway, duna sab gyuy nasudnong balaod labot niini ug mao kini ang buot iimplementar diha sa dapit.
Hinuon sa pagka-karon, experimental pa kini ug ipatuman lang una atol sa peak hours, o alas 6 ngadto s alas 9 sa buntag ug alas 4 sa hapon ngadto sa alas 8 sa gabii.
Sa unang adlaw sa pagpatuman niini, nakita ni Tumulak, ang paspas na nga pag-irog sa mga sakyanan sa eskina Laray-SRP.
“Nakatabang gyud siya pagpalu-ag sa dagan sa traffic sa SRP unya paspas na ang dagan samga sakyanan kay wan a may slow moving vehicle nga hinungdan nga malangay sila,” niingon si Tumulak.
Nangayo si Tumulak sa pagsabot sa mga trisikad driver, lakip na sa mga pasahero niini sa mao nila nga lakang. Matod niya, alang usab kini sa kaayuhan ug kaluwasan sa publiko. (AZLG)