Ambush di scripted: BJMP

GIHIMAKAK ni Talisay City Bureau of Jail Management and Penology (BJMP) warden Mary Jane Enopia nga drama ang pagpang-ambush patay sa tulo ka mga piniriso niadtong Biyernes sa buntag sa Barangay Maghaway, dakbayan sa Talisay.

Kini taliwa sa pagduda sa publiko nga “drama” ang nahitabo ug gisabot na daan ang pag pang-ambush. Ang dapit nga nahitaboan di pa kaayo layo gikan sa Talisay City Jail.

Matod ni Enopia nga gusto niya wagtangon ang mga pagduda sa publiko.

“I would like to dispel that. Di na tinuod,” matod pa niya sa interview sa Superbalita Cebu.

“Sakit kaayo sa among part nga ingnon nga scripted ang nahitabo nga di man gyud na mao,” dugang pa niya.

Ang tulo ka mga piniriso nga giingon nga nalambigit sa ilegal nga drugas patay nang naabot sa tambalanan gumikan sa mga samad pinusilan.

Ang duha ka mga jail officer wa hilabti sa mga killer, apan gipangtionan ug gikuhaan sa ilang mga armas.

Ang dapit diin nahitabo ang giingong ambush nahimutang mga 300 ka metros gikan sa jail facility.

Unsay nahitabo?

Sa imbestigasyon sa kapulisan, nitumaw nga labing minos 14 ka mga tawo nga nag-angkasay sa motorsiklo ang nang-ambush.

Usa ka motorsiklo ang natumba sa karsada, apan wa hunongi sa mga jail officer.

Ang duha ka mga sakay namusil sa likod sa sakyanan.

Dihang mopakusog na unta sa pagpadagan ang driver, giingong ningtunga ang laing unom ka mga motorsiklo nga dunay tagduha nga mga sakay.

Wa na makasukol ang mga jail officer kay gitionan na sila, gipakanaug sa sakyanan ug gipahapa sa karsada.

Gitabangan sa pagpusil sa mga killer ang mga piniriso nga sila si Yayam Gabiola, 41; Marwin Abelgas, 28;s ug Jovencio Rabadon, 36.

Duha kanila dunay kasong illegal drugs, labina si Abelgas, kinsa nakuhaan og P20 milyunes nga shabu sa raid sa Philippine Drug Enforcement Agency (PDEA) 7 sa 2017.

Ang BJMP personnel niagi sa dapit tungod kay mas duol kini nga rota padulong sa Talisay city hall diin toa ang korte nga husayan sa kaso sa tulo. (Jude Suhot - Correspondent)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph