MAGTIAYON ug inahan nga sakop kaniadto ni Jeffrey Diaz, alyas Jaguar, nasikop sa Mabolo police station niadtong Biyernes pinasikad sa search warrant nga giluwatan ni Judge Ramon Daomilas sa Regional Trial Court (RTC) Branch 11 sa syudad sa Sugbo.
Ang nangasikop mao ang magtiayong Lorie Jane, 34, ug Wilbert Dionisio, 35.
Lakip sa nasikop ang inahan ni Lorie Jane nga si Lorna Cajes, 53, taga Purok 6, Sitio San Miguel, Barangay Apas, siyudad sa Sugbo.
Nakuha gikan kanila ang 40 ka gagmay nga putos sa gituohang shabu, siyam ka medium size ug usa ka bulto lakip na ang usa ka putos sa pinaugang dahon sa marijuana nga mokantidad ang tanan og P1,239,000.
Matod ni Senior Inspector Dindo Juanito Alaras, hepe sa Mabolo police station, nga sa wa pa nila gi serve ang search warrant, nihimo una silag surveillance ug test buy.
“Kanang iyang mama niduwa man na sa Pasil, kang jaguar man to nga linya iyang mama. Unya, pagkoan nato, test buy sa asset, ang lalake man ang napalitan, kanang anak niya. Apil sad nang asawa ana, namaligya sad na,” matod ni Alaras.
Si barangay konsehal Ramil Ayuman, kanhi kapitan sa Barangay Apas, nagkanayon nga niadtong siya pa ang kapitan, nagpatabang kini kaniya aron mo-surrender sa Oplan Tokhang.
Nisaad na, matod pa kini, nga di na mobalik sa illegal nga negosyo.
Gani, naninda na kini og barbecue gawas sa ilang balay.
Apan na monitor nila nga namaligya na usab og illegal drugs sigun sa mga pamahayag sa mga silingan tungod sa wa mailhing mga lalake nga moadto sa ilang balay aron mamalit.
“Kining magtiayona (Dionisio) ni surrender na ni nato diri sa barangay. Nisaad nani nga dili na mamaligya, nag negosyo nanig barbecue. Oy nibalik man (base) sa among na monitor,” matod ni Ayuman.
Duha ka tuig na ang nakalabay, ang magtiayon Lorie Jane ug Wilbert ningdangop sa Superbalita Cebu ug DYHP RMN Cebu aron ireklamo ang pito ka mga pulis sa Mabolo human gisikop ilang inahan nga si Lorna sa kaso gihapon sa illegal nga drugas.
Usa sa mga nagdakop niini nanawag kang Lorie Jane nga kon gusto sila nga paubsan ang kaso gikan sa drug pushing, ilang himuong possession nalang bugti sa P100,000.
Na-record sa magtiayon ang ilang panag estoryahanay sa telepono nga maoy hinungdan sa pagkarelibo sa pito ka mga pulis nga gilabay usab dayon sa Police Regional Office 7 sa Mindanao.
Giangkon sa magtiayon nga kaniadto namaligya ang ilang inahan sa Pasil apan niundang na, matod pa, kini sukad sila nibalhin sa pagpuyo sa Barangay Apas.
Kasong paghupot ug pagpamaligya og drugas ang atubangon sa tulo ka mga suspek.