SECTIONS
Saturday August 18, 2018
SUPERBALITA CEBU

4-anyos gilubong; ‘hustisya’ singgit sa taga Ermita

“INIG sirado namo ani Baby Sky, hayag kaayo na dinha. Ayaw’g hilak didto ha?”

Mao kini ang uwahing mensahe nila ni Gwen Capuno ug Mark Anthony, mga ginikanan sa 4-anyos nga si Bladen Skyler Abatayo human nila giablihan ang lungon sa bata ug mihawok sa aping niini atol sa lubong kagahapon sa hapon.

Si Skyler kinsa mas naila nga Baby Sky, gilubong na kagahapon sa Carreta cemetery diin nihatod ang ilang mga silingan sa Sitio Bato, Barangay Ermita, nga nangayo og “Hustisya!”

Aduna’y mga bata nga nagsul-ob og puti nga bandana ug itom nga senina nga aduna’y suwat nga “Justice for Sky.”

Atol sa requiem mass kagahapon sa Our Lady of Mt. Carmel-Recoletos, niawhag si Fr. Ricardo Pitogo sa iyang wali nga ipatigbabaw ang kalinaw.

“Let’s send him off in peace. Ang kinabuhi sa usa ka tawo, di nato masabtan ang panghitabo. Sa iyang pagka-inosente, nganong nahitabo man ni nga napagan siya? Dili sala ni Skyler,” matod ni Pitogo.

Namatay si Skyler human siya maigo sa saag nga bala atol sa validation sa anti-drugs operatives sa taho nga upat ka suspected drug personalities naa sa pikas balay tupad sa gipuy-an sa mga Abatayo niadtong Hulyo 10.

Pabilin nga at-large ang giingong drug personalities samtang nagpadayon ang imbestigasyon sa Philippine National Police-Internal Affairs Services (PNP-IAS), National Bureau of Investigation (NBI) 7 ug Commission on Human Rights kabahin sa maong insidente.

“I am sorry that it happened to an innocent child. When we talk about war on drugs, even innocent lives pwede madamay. This is a classic example already,” matod ni Cebu City Police Office (CCPO) Director Senior Supt. Royina Garma

Dugang ni Garma nga usa ka eye-opener ang maong insidente sa tanan.

Nipasalamat usab si Mark sa publiko nga niduyog sa ilang pagbangutan sa kamatayon sa ilang anak. (JOB sa Sunstar Cebu)


VIEW COMMENTS