KUHAON ang background. Personal o dunay kalambigitan sa trabaho. Mao ni ang naandan rong linya sa mga pulis nga nag-imbestigar sa mga kaso sa pagpamatay.
Ning uwahing mga adlaw, sukad si Senior Superintendent Royina Garma nilingkod isip Cebu City police director, naa dayon ang pakapin nga estorya nga mas maayong moundang ug molayas dinhi sa Sugbo kon nalambigit sa illegal drugs o gidudahan nga apil niini.
Kon analisahon, mahimong ma-interpret ang bahad nga patyon kini kon di mohawa ug moundang sa ilegal nga buhat. Mopasamot na hinuon ang mga pagduda nga kon wa suportahi sa mga awtoridad ang uwahing mga pagpamatay, duna silay kasayuran kinsa kining mga tawhana.
Ang mga linya man gud sa estorya sa kapulisan maora nag standard. Wa nay lain.
Ang imbestigasyon usab miungot kay ang mga imbestigador way gihimo.
Mao lagi nga di kalikayan nga kadudahan ang mga nahitabo karon nga dunay bendisyon sa kadagkuan kay kalma ra kaayo ang mga pulis ug duna silay standard nga tubag.
Ang nakapait kay namatyan pa ang mga tagtungod, nadugangan pa ang kasakit tungod sa makainsulto nga mga pamahayag kay di kuno maayo og background ang biktima.
Kon durugista man ang napatay, gidudahan man o dunay kaso sa korte, legal na ba diay ang pagpatay kanila? Di ba krimen man gihapon ang pagbuhat niini kon ipasubay sa balaud? Inosente ang usa ka tawo hangtod nga mamatud-an nga guilty sa hukmanan.
Unsa na lang diay kapuslanan sa balaud kon kini yak-an ug tumban tungod lang kay gidudahan ang usa ka tawo nga durugista? Unya kadtong nangaangin lang kay naalaan o napagan, isipon lang nga collateral damage sa gubat batok sa drugas? Makahahadlok, di ba?