ITI pannakaisursurat daytoy nga espasyo (Karit) mabalin a manarimaanen ti State of the Nation Address ni Pres. Duterte. Natural, sangsangkamaysa ti saludsod dagiti umili: ania ngata (manen) ti launen daytoy a Sona? In short – ania ngata ti KARGANA? Dua laeng ti atapen dagiti nabusisi nangruna kadagiti kontra-Digong: ubbaw manen a SONA kas kadagiti immuna. Kuna met dagiti agtalek ken sumursurot kadagiti nagappuanan ti Duterte administration: nabagas ken nabunga ken makapnek ti linaon ti SONA. Ala saggaysaentayo man a kulanitan ti amin a suli dayta a pasken – ti maikatlo a SONA ni Digong:
***
Kasano ngata ti kaatiddog ti SONA ita ni President Duterte? Mabalin a dayta ti umuna a pangikugnalantayo iti diskusyon, kailian. Kas nakuna ti Malakanyang babaen iti opisyal a mangibagbagi iti presidente iti linya ti kumyunikasyon (Secretary Andanar) saan kano nga aglabes iti tallupulo a minutos ti SONA base iti naisagana a mensahe a basaen ti presidente.
Awan ti makaibaga, uray pay kadagiti nagisagana iti script no deretso a basaen ti presidente ti SONA messagena wenno masingitanna (kas gagangay) kadagiti napapateg a banag a kayatna a yebkas. Ket no mapasamak ti kasta, imposible a dina labsan ti 35 minutes.
Pagaammon ti kaadduan no kasano nga agbitla wenno mangted mensahe ti presidente. No naimasannan ti dimmaplis...ay ket daytan ti rugi ti gubat, este, kontrobersiya. Ti imasna ngamin dagita met a daplis ti pagay-ayat dagiti adda iti tallaong iti tunggal agbitla ti presidente. Nangruna kunam no adda paipusna a basnot a maidalan iti angaw wenno nasakit a kuddot nga agbalin a kugtar ken kugsil.
Dayta met ti pagay-ayat ken tagiurayen dagiti kontra Digong tapno pagpiestaanda manen a sutilen ken pangkantiaw ken pangdadael iti kintaona.
***
Mailagip kailian nga ti immuna gayam a SONA iti pakasaritaan ket idi pay Nobyembre iti tawen 1935 babaen iti daydi nagpresidente Manuel Quezon. Ti kaatiddogan a SONA ket idi 1969 babaen kenni daydi nagpresidente Ferdinand Marcos idinto ta ti kaababaan a SONA ket kenni nagpresidente Gloria Macapagal Arroyo. Ditayon malagip pay dagiti linaon dagita a SONA iti nagduduma a panawen ngem maymaysa laeng ti kaibatogan ti amin: nagappuanan ken masungad a programa.
Kaadduan met kadagiti SONA dagiti nagpresidente ket giniddanan dagiti protesta a malimogan iti pannakaiparada ti rupa dagiti presidente nga agtupalto iti pannakauram iti imatang ti publiko. Tsk tsk nagbalin san a kannawidan wenno tradisyon nga adda gumiddan nga ikkis tunggal SONA.
Dayta ti gapuna no apay a batalyon dagiti kameng ti otoridad ti maisagana tunggal dumteng ti SONA. Natural, dakkel a paggastuan dayta a pasken, saan aya? Ngem masapul a masaganaan a naimbag tapno saan a masingitan babaen kadagiti killo a panggep. Kuna met dagiti opisyales ti PNP a kas iti sigud ipakatda manen ti maximum tolerance. Dayta a balikas ti nakaam-amak.
Ngamin, saan nga agarmas dagiti maimontar nga agsirbi para iti seguridad idinto ta pagaammon ti amin nga armado dagiti kalaban kas pangarigan, saan aya? Sabagay agtalektayo iti kuna dagiti pannakabagi dagiti militante a grupo a didanto agaramid iti gulo ken maikaniwas no di ketdi agtulnogda iti naurnos a panangipeksa iti karirikna. Sapay koma, pards.
***
Ngem ania ngata ti mabalin a launen ti mensahe ni President Duterte? Awan naibaga dagiti napagamadan nga opisyal ti Palasyo. Ngem mabalintayo met ketdi ti agpugto maibase kadagiti napaspasamak iti naglabas. Panagkunatayo, adda latta dagiti updates iti kampanya kontra illegal a droga; programa kontra krimen; isyu ti Narco-list ken dagiti maseknan a karaman dita; isyu ti West Phil Sea ken ti relasyon ti Pilipinas ken China; Build, build, build, a kayat nga iyapura ni Digong ta kasla nabuntog sa kano; pannakaipaiserra ken rehab ti Boracay; paempleo ken kontraktualisasyon; korapsiyon ken solusyon a naaramid; turismo ken edukasyon, ngem kangrunaan iti amin ket ti panangipasa ti BiCam iti BBL a mangsukatton iti ARMM.
Mabalin kano a sakbay iti SONA ket pirmaanen a kas linteg ti nasao a dokumento. No addaman mainayon pay a pasingit, dagita ti intayto suroten, pards. Arasaas: amangan ta adda met ibida ni Digong iti saritaanda iti PM ti Malaysia a kinagiddan ti panangsaksi ni Pres. Duterte iti laban da Sen. Pacman ken ti pinadsona a taga Argentina.
Ti imasna no maganasanna ti mangted iti sidelights ti boxing match...yamakmi a mapan iti oras ti kaatiddog ti SONA.
***
No sibibiag pay lang daydi lolok siyento porsiyento a mapan met agnganga, este, agbuya ken dumngeg iti Sona ni Pres. Digong. Amangan ta kayatna met ti makiabay kada Ex Presidents Fidel Ramos, Erap Estrada, Gloria Arroyo ken ni Vice President Leni Robredo.
Mabalin nga isunto ngata ti kapipigsaan ti palakpakna no nagbusin ti ngangaw ni Digong. Ngem ammok a siimen ni lolok ket ti aruaten dagiti adda iti tallaong nangruna kadagiti babbae a mammanday linteg wenno assawa dagiti lallaki nga opisyales.
Ammo ngamin ni lolok a kadagiti naglabas a Sona dagiti nagpresidente iti pagilian...ket kasla fashion show ti programa. Pinnapintasan ken pinnanginaan iti kawes wenno gowns wenno barong dagiti opisyal. Ngem kasano ngay lolo ket imbawaldan sa metten ti nagarbo nga aruaten iti daytoy a Sona ni Digong?
Siguro no adda masikwat ni lolok a celfon uray no tay pagbarsak ti mangga a model...ikarigatanna siguro ti agselfie no maabayanna ni Digong.
He he dayta ti galad ngamin dagiti kailiantayo tunggal malpas nga agbitla ti presidente kasla awanen ti ressat ti gilap dagiti kamera tapno adda kano maipannakkelda a ladawanda kenni Digong.
Sige, lolong obserbaram a naimbag ta ireportmonto manen iti Karit dagiti basnotmo, wen?
***
Pasagid: sapay koma ta saan laeng a panagsaludo ken pammadayaw ti mangegan kenni President Duterte iti SONA-na. Iramanna met koma kano a daplisan ken sapliten dagiti otoridad a nakaaramid iti nakababain nga accomplishments kas koma iti kotongan, turog-duty, ken adu pay a krimen a nakairamanan dagiti otoridad.
Ikkanna met koma iti uray kiddis a basnot ti isyu ti basura, congestions ken parikut iti pabalay nangruna kadagiti marigrigat. Mainayon pay koma met ti komentona panggep iti PH Province of China a bimmalagbag kadagiti overpasses iti NCR itay kallabes nupay awan kano ti kasta a takder kuna met dagiti opisyal ti Tsina. Ken ania ngata ti karirikna ni Presidente iti rason ni VP Leni no apay a tumabuno iti SONA. Kayatna kano nga ammuen ken paneknekan no pudno nga adda nagappuanan ni Digong kas presidente.
Ania met ngata ti makuna ni President Duterte iti rason ni Ex-Pres. Noynoy Aquino no apay a saan a tumabuno iti SONA? Ngamin , kas kunana (Noynoy) adu kano ti tsismoso ken tsismosa iti dayta a tallaong isu nga agabsent laengen.
He he nia’t makunayo appomi? Sorry ngem awanen ti espasyo. Adios mi amor, ciao, mabalos!