Nadela: Ang manokan sa Tumalog

USA ka halandumon nga biyahe ang akong nakuyogan niadtong Sabado. Gitawag kadto og round South sa akong higala nga si Dimos nga maoy nagtimon sa manibela og akong agaw 'Jojo' ug iyang bugtong anak nga si Simon sa back seat. Alas 5 sa buntag gisugdan namo og latas ang taas nga highway padung sa Carcar City.

Sa gipaabot nang daan ang biyahe di matulin tungod sa nagpadayon nga road concreting project nga gipatuman diha sa south. Halos tanang lungsod nga among naagian may mga pat-ak pat-ak nga pagtrabaho sa karsada mao nga apektado ang bul-og trapiko. Hasol alang sa mga dunay giapas nga appointment. Ilabi na sa mga mobiyahe agi sa airport mas maayo nga mangadlawon na lang gyud. Kadtong may appointment sa doktor ang akong sugyot mas maayong ysa ka adlaw sa di pa ang check up nia namo sa siyudad. Ang kahasol baya makadugang sa sakit. Samot na kong abtan ka sa sugo sa lawas. Sa mga estudyante mas maayo pa nga mag boarding house nalang kay sa magsige og pauli. Kay sa akong nakita dugay pa mahuman kining kalbaryo nga inyong gipas-an.

LAMBUG

Usa sa dapit nga among gilili mao ang puti nga baybayon sa Lambug sakop sa lungsod sa Badian. Didto akong nahimamat ang pipila sa mga molopyo. Usa nila mao ang 83 anyos nga si Alice Emperado kinsa nisulti nako nga ang maong dapit mao nay ilang naandan nga kaligoanan. Matod niya ang daplin sa baybayon dasok sa daghang tanom og hilabihang mingawa. Way bisan usa nga nagpuyo. Ang ilang pinuy-anan distansiya ra kaayo gikan sa baybayon diin nahimutang ang ilang umahan. Karon namungingi na sa daghang balay ang daplin sa baybayon. Kasagaran nag negosyo pinasgi sa pag-atiman sa mga tawo nga modagsa aron mangaligo. May nagtukod og pahulayanan, imnanan nga may videoki, pagkaon og daghan pa. Hinuon sa mga gustong magbawon og makalikay sa gasto mahimo ra gud nga magtulda tulda sa daplin total ang puting bas sa Lambug gipanag-iya man sa munisipyo.

TUMALOG

Paglabay sa pipila ka minutos nibiya nami alang sa laing distinasyon. Ang importanting katuyoan sa maong biyahe. Kini mao ang gamay nga manokan ni Mat Dumdum sa Barangay Tumalog sakop sa lungsod sa Oslob nga may gilay-on nga 14 kilometros hikan sa National Highway. Hapon nami naabot didto. Ning hugayona kuyog na namo ang I.T. expert nga si Ryan Rendon higala ni 'Mat.'

Ang Tumalog ilado kaayo tungod sa nindot niini nga waterfalls nga gibahaan sa daghang bisita matag adlaw nga tanan. Gusto unta ko nga molili apan may gilay-on kini gikan sa manokan ni Mat. Didto sa pinuy-anan ni Mat kadto pa ko naka kita og klase sa manok nga gitawag niya og Basilan og sa mgacTagalog gitawag daw ni og Parwakan. Lahi nga klase sa manok nga ang iyang lami susama ra manok bisaya.

Si Mat nitug-an nga tungod sa iyang gugma sa pagpamuhi og kahayopan nagkuha sita og 35 ka bate og 40 ka laki gikan sa iyang ig-agaw sa Buanoy, Balamban duha ka tuig ang nakalabay. Nuntan sa ka kugi karon namuwak na sa daghang manok ang palibot.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph