GIHULAGWAY ang “old wild west” sa mga pelikula sa sine nga gitawag og “western” nga mga lugar sa Estados Unidos kaniadto nga gihakop sa kasamok ug sa mga bayolenting panghitabo.
Kadaghanan mao ang mga kaso sa mga pagpamusil ug pagpatay. Sagad sa mga nagbuhat niini mao ang mga gikaintapang mga tulisan ug kadtong gigukod sa balaod, samtang ang mga biktima mao ang mga malinawon nga lomulupyo.
Mao nga sa dihang nikalit lang og kirig ang usa ka tawo didto sa lugar sa mga pistolero ug mga kawboy, ang mga kadagkoan sa ilang lungsod niingon nga buhi pa tingali ang maong tawo kay wa may samad agi sa pinusilan.
***
Sunod-sunod ang mga kaso sa pagpatay dinhi sa Sugbo. Ang labing ulahi mao ang pagbanhig niadtong Biyernes sa buntag ni Art Stephen Bas, 23, bag-ong konsehal sa Barangay Lagtang, Talisay City ug apo ni Talisay City Councilor Arturo Bas.
Niadtong Biyernes, tulo ka mga piniriso sa Taliosay City Jail nga padulong sa korte aron motambong sa bista sa korte sakay sa jail van ang nangamtay sa dihang gibanhigan sa wa pa mailhing mga tawo mga 300 metros gikan sa maong prisohan.
Samtang usa ka 17-anyos nga lalake ang gipusil patay sa duha ka wa mailhing mga maumuno samtang nagduwa og buwan-buwan kuyog sa iyang mga higala didto sa Purok Rose sa G. Ouano St., Brgy. Opao, dakbayan sa Mandaue, Sabado sa kadlawon.
***
Ang mga tinugyanan sa balaod niingon nga way angay nga kahadlokan ang mga tawo, ang mga yanong lomulupyo, kon wa silay nahimong krimen, ilabi na gyud sa kalambigitan sa illegal nga drugas.
Apan sumala pa sa mga taho, ang mga killers wa magdaginot sa ilang mga bala, giseguro gyud nga mapatay ang ilang target. Di kalikayan ang mga kabalaka nga sa mga kaso nga ingon niana, hayan dunay mga mapagan sa saag nga bala nga kon makagawas na sa sunggohan sa pusil, “to whom it may concern na.”
Maayo gani tong pag-ambush sa jail van sa Talisay kay gipahapa man sa karsada ang duha ka mga jailguard escorts ug wa maapil.