FELIXBERTO A. ESCLAMADO, JR.
Saac II, Mactan, Lapu-Lapu City, Cebu
WALA maglangay si Coco. Miadto siya sa baga nga katunggan aron pagpanikop og mga kasag ug alimango nga iyang ibaligya sa iyang mga suki sa ilang dapit. Apan ang labing mahinungdanon kaniya mao ang pagpakigbugno sa higanteng alimango nga matod pa sa usa ka meriko gipanag-iya kini sa engkanto diha sa baga nga katunggan.
Matod pa sa tambalan mao kini ang makapahibalik sa tinuod nga panagway ni Coco nga nahisama sa dagway sa alimango. Daghan ang natingala kang Coco kay daghan man kinig makuha nga alimango nga moabot og tag napulo ka kilo, samtang ang uban tag tulo ra ka kilo. Kini gikahibulong kaayo sa mga lumolupyo sa ilang dapit.
Nasayod si Coco nga peligro ang mga alimango nga dagko kaayo ang paak, nga gikabalaka kaayo sa iyang inahan nga si Andrea. Namatay ang tatay niya Barok kay napaakan kini sa higanteng alimango dihang nanguot og kasag ug alimango sa katunggan. Dihang gikuot ni tatay niya ang dakong lungag sa alimango kalit gikuninitan sa mga dagkong paak ang iyang kamot ug wala gyud buhii hangtod naabtan siya sa taob. Wala gyud buhii sa mga paak sa higanteng alimango ang kamot sa tatay ni Coco, mao nga nalumos kini ug namatay. Gikaguol pag-ayo sa inahan ni Coco ang kamatayon sa iyang amahan. Dili gusto si nanay niya Andrea nga mahitabo kaniya ang nahitabo sa iyang tatay Barok. Pinangga ni Andrea si Coco kay mao na lang kini ang nahibilin nga handumanan sa mitaliwan niyang bana.
Nahinumdom si Andrea nga usa niana ka gabii samtang nagtan-aw siya sa TV, sa teleserye nga gibituonan ni Coco Martin, nalingaw siya sa aktor nga guwapo. Gusto niyang maliwat ang iyang gisabak sa maong artista. Misaad siya nga nganlan niyag Coco inigkatawo sa iyang gisabak. Apan dihang nahiuli si Barok nga nagdala og daghang kuha nga kasag ug alimango napakgang ang pagpangala ni Andrea sa ambungang aktor. Didto na hinuon si Andrea magsige og yampungad sa dakong bukag nga puno sa alimango. Ingon sa gidaog siya sa kamandag niini.
Dihang gihimugso ni Andrea ang batang lalake nahisama kini sa dagway sa alimango. Hilabihan ang kalagot ni Andrea kang Barok. Iya kining gibalikas ug giingnan nga maayo untag mapaakan kini’g higanteng alimango, nga natinuod gayud.
Kanunay sungugon si Coco dihang nagtungha na siya sa elementarya sa kauban niyang mga bata sa eskuylahan. Usahay mopalta siya sa klase sa tumang kaulaw. Bisan sa tanang kakulian nakatapos gihapon siya sa elementarya. Sa Senior high school na siya gikahibalag niya si Charo nga nahimo niyang hinigugma. Bisan sa iyang nawong nga sama sa alimango wala magpanuko ang dalaga paghatag sa iyang gugma kang Coco, tungod sa pagka buotan niini. Matahom si Charo. Daghan ang naninguha sa gugma niini nga mga anak og adunahan sa ilang dapit nga gustong mangasawa kaniya.
Usa ka adlaw, hapit na mogabii wala pa mahiuli si Coco sa ila bisan buntag pa sayo siya nga migikan paingon sa dagat. Gikulbaan si nanay niya Andrea ug si Charo kay nagkalawom na ang gabii apan way Coco nga miuli. Dako ang ilang pagtuo nga gikuninitan kini sa mga dagkong alimango sa katunggan ug wala na buhii.
Nianang pagka buntag may nanuktok sa pultahan nilang Charo. Giablihan ni Charo ang pultahan ug usa ka ambungan nga lalake ang iyang nakita nga nagbarog sa ilang pultahan. May dala nga higanteng alimango. Guwapo kini ug kaamgid ni Coco Martin nga usa ka aktor. Ingon sa dili makatuo si Charo sa iyang nakita kay ang mga sapot sa lalake parehas gyud sa mga sapot ni Coco sa dayon na niining lugsong paingon sa dagat.
Mipahiyom ang lalake kang Charo ug misulti, “Si Coco ako, Charo. Nahanaw na ang tunglo kanako tungod kay nakuha na nako ang higanteng alimango nga iya sa mga engkanto!”
Miduol si Charo kang Coco ug migakos. (KATAPUSAN)