SECTIONS
Wednesday August 15, 2018
SUPERBALITA CEBU

Thank you Toronto: DeRozan

DeMar DeRozan

PINAAGI sa iyang Instagram account, gipadayag ni DeMar DeRozan ang iyang kinasingkasing nga pasalamat ngadto sa mga sumosunod nga ning-abiba kaniya sulod sa siyam ka mga tuig niyang pagduwa sa Toronto Raptors sa National Basketball Association (NBA).

“Words could never express what you’ve meant to me. I was just a 19 year old kid from Compton when we first met, but you took me in and embraced me as one of your own,” post ni De Rozan.

“I am so grateful for the Love and Passion that you’ve given me over the past 9 years. All I ever wanted to do was duplicate it 10x over just to show my appreciation. Thank you Toronto, thank you Canada. #Comp10#ProveEm.”

Si DeRozan, kinsa mag-29 anyos sa sunod buwan, nakugang dihang iyang nasayran nga gi-trade siya sa Raptors ngadto sa San Antonio Spurs alang sa sama kaniyang All-Star nga si Kawhi Leonard.

Gani gipadayag ni DeRozan ang iyang kapungot sa desisyon sa Raptors, hinuon iyang gitataw nga nakasabot ra siya niini.

“Be told one thing & the outcome another. Ain’t no loyalty in this game. Sell you out for a quick bit of nothing ... Soon you’ll understand ... Don’t disturb,” post ni DeRozan.

Ang presidente sa Raptors nga si Masai Ujiri nangayo og pasaylo kang DeRozan nga wala dayon siya pahibaw-a sa desisyon sa team.

Ang Toronto mitudlo kang DeRozan isip 9th overall pick niadtong 2009.

Gikan sa iyang pagsulod sa Raptors, si DeRozan mao na ang nahimong lider sa team ug nag-una kini sa statistical categories.

Sa pagpangulo ni DeRozan kaabag si Kyle Lowry, ang Raptors nakataak sa Eastern Conference finals niadtong 2016 apan gitagak sila sa Cleveland Cavaliers niadtong higayuna.

Nakasulod gihapon sa playoffs ang Raptors sa nagsunod nga duha ka seasons apan kanunay silang masangit sa Cavaliers. (AFP, ESL)


VIEW COMMENTS