MAGHUGPONG karong Huwebes ang Philippine Basketball Association (PBA) Board of Governors aron pangitaan og sulosyon ang gisagubang nga dakong problema sa Gilas Pilipinas human 10 sa mga magduduwa niini ang gipahamtangan og suspensyon sa FIBA.
Unang tutokan sa panaghugpong mao ang partisipasyon sa Gilas Pilipinas sa 2018 Asian Games basketball event nga ipahigayon sa sunod buwan sa Indonesia.
Nagkanayon si PBA commissioner Willie Marcial nga sa inisyal nilang kasabutan, ang kinatibuk-ang puwersa sa Rain or Shine Elasto Painters na lang ang morepresentar sa Pilipinas alang sa Asian Games nga ipahigayon karong Agusto 18 hangtod Septiyemnbre.
Ang Elasto Painters mihangyo nga mokuha og mga magduduwa gikan sa ubang teams apan gipasabot ni Marcial nga lisod kining mahitabo tungod kay magpadayon ang kombati sa PBA atol sa Asian Games.
“It can’t be done because the PBA isn’t stopping play during the Asian Games period. We’re allowing only one ball club. We would free them of games in the PBA while they’re in the Asian Games,” pasabot ni Marcial sa interbyu sa PBA.ph.
“Maybe, Rain or Shine can take a look at the Gilas cadets considered by TNT.”
Gipangtumbok ni Marcial mao sila si Abu Tratter, Kobe Paras ug Richie Rivero.
“The ROS owners have said yes, and the governors of the other teams are okay with it,” dugang ni Marcial.
Sa laing bahin, nahilakip sila si Christian Standhardinger ug Arwind Santos sa San Miguel Beermen, Greg Slaughter sa Ginebra Gin Kings, Vic Manuel sa Alaksa, Raymond Almazan ug Beau Belga sa Rain or Shine sa mga magduduwa nga ningpadayag sa ilang kaandam nga mohulip sa mga magduduwa sa Gilas nga gipangsuspenso sa FIBA.
Ang mga magduduwa sa Gilas nga gipangsuspenso sa FIBA mao sila si Calvin Abueva, RR Pogoy, Terrence Romeo, Jayson Castro, Troy Rosario, Jio Jalalon, Matthew Wright, Japeth Aguilar, Carl Bryan Cruz ug Andray Blatche.
Ang mga nangahisgutan gipangsilutan tungod sa pagkahilambigit niini sa karambola nga nahitabo atol sa duwa sa Gilas ug Australia sa Boomers niadtong Hulyo 2 sa FIBA World Cup Asian Qualifiers sa Philippine Arena sa Bocaue, Bulacan.
Wala sab makalikay sa suspensyon sila si Gilas headcoach Chot Reyes ug assistant coach Jong Uichico.
Si Manuel nipadayag nga dugay na niyang pangandoy nga makarepresentar sa nasod sa international competitions hinungdan nga dili niya buhian kon hatagan siya ning maong oportunidad.
“Siyempre kung mabibigyan ng chance, malaking tulong yun,” batbat ni Manuel, kinsa usa sa labing sinaligan sa Aces, sa interbyu sa Spin.ph.
“Gusto ko rin namang makatulong sa kanila (Gilas).”
Si Standhandinger, kinsa maoy No.1 overall rookie pick ubos sa Beermen, nagpanikad sab nga makarepresentar og balik sa Pilipinas. (ESL)