SECTIONS
Friday August 17, 2018
SUPERBALITA CEBU

Taga Cordova ang Huwarang Pantawid Pamilya

PAMILYA og panday ang mananaug sa Huwarang Pantawid Pamilya sa rehiyonal nga level karong tuiga.

Gipahibawo sa Department of Social Welfare and Development (DSWD) 7 nga ang pamilya nila ni Cloduoldo ug Ofelia Campugan, taga Barangay Poblacion, lungsod sa Cordova, Sugbo ang napili nga maoy morepresentar sa Central Visayas sa national search sa HPP 2018.

Ang HPP, usa ka search alang sa banay nga magsilbi nga modelong pamilya sa Pantawid Pamilyang Pilipino Program kun 4Ps.

Ang pamilyang Campugan makadawat og cash prize ug plaque of recognition atol sa awarding ceremony sa ipahigayon nga Panaghiusa Festival sa DSWD 7 karong Disyembre sa Ayala Center Cebu.

Si Clodualdo, haligi sa panimalay, nakatapos lang og elementarya ug nagtrabaho isip usa ka panday. Apan nagmaneho usab siya og trisikad aron dugang kita alang sa iyang pamilya.

Samtang ang iyang asawa nga si Ofelia, nagluto ug namaligya og mga pagkaon ug lagutmon.

Ang magtiayon kay dunay unom ka mga anak sila si: Kimberly, Clavel, Jesper, Pamela, Clofel Mae ug Haneleth.

Paambit ni Clavel nga nakita nila ang gihimo nga mga sakripisyo sa ilang mga ginikanan hinungdan nga determinado sila nga makahuman og eskwela isip bawos ngadto sa ilang amahan ug inahan.

“We cannot ask for better parents, they are already perfect and the best parents for us,” pahayag ni Clavel kinsa bag-uhay lang nakatapos sa kursong Psychology sa University of the Philippines (UP) Cebu.

Ang mga anak sa magtiayong Campugan mga academic achiever ug nagpakita og talagsaong mga talento ug mga kahanas hinungdan nga sila ni-qualify sa scholarship grants.

Pulos usab sila mga honor student sukad pa sa elementarya ug aktibo usab sila sa extracurricular nga mga kalihokan isip mga miyembro sa lainglaing mga organisasyon sa ilang mga tunghaan.

Matod ni Clodualdo nga dili makapatapulan ang 4Ps.

“Mas maningkamot pa gani og trabaho para matubag gayod ang panginahanglanon sa pamilya. Ang Pantawid alang gayud sa pagpaeskwela sa mga bata ug sa ilang panglawas. Dako gyud akong pasalamat niini ug sa mga nakat-unan namo sa pag-attend sa Family Development Session (FDS)” dugang niini.

Si Ofelia, usa ka cancer survivor, niangkon nga nakasugat og mga kalisod ug mga hagit sa kinabuhi apan siya nakasugakod pinaagi sa gugma sa Ginuo ug sa ilang pagsalig Niini.

Samtang ang pamilya nila ni Edgardo ug Pacita Oque nga gikan sa Cabacnitan, lungsod sa Batuan, Bohol ang nahimutang sa ikaduhang dapit sa regional search.

Ang pamilya nila ni Nestorio ug Judelyn Suple gikan sa Barangay Linantayan sa lungsod sa Basay, Negros Oriental ang third placer ug ang pamilya nila ni Paulbert ug Jenny Bagundol gikan sa Barangay Cantugbas, lungsod sa Maria, Siquijor ang fourth placer.

Ang 4Ps usa ka programa sa nasudnong kagamhanan nga nag-ayuda sa kahimsog ug edukasyon sa labing kabos nga mga pamilya nga dunay mga anak nga nagpanuigon og 18 anyos ug paubos.

Kini gipatuman sa DSWD kaabag ang ubang mga ahensiya sa gobiyerno sama sa Department of Education (DepEd) ug Department of Health (DOH).

Ang mo-qualify nga pamilya ug mahimong benepisyaryo sa programa, makadawat og cash grants nga P500 alang sa maayong panglawas ug educational grants nga tag P300 matag bata nga nagtungha sa elementarya ug P500 sa matag nag-eskwela sa high school. (SCG,PR)


VIEW COMMENTS