GILAYONG gimandoan ni Department of Education (DepEd) Davao City Division School's Superintendent Dr. Maria Ines Asuncion ang mga magtutudlo sa Bustamante Central Elementary School nga mohimo dayon og emergency class.
Suma ni Asuncion nga isal-ot sa mga room sa duol nga tulunghaan sa dapit ang mokabat 600 ka mga estudyante aron maka-klase sila.
Dunay mga room sa kasikbit nga mga tunghaan sa Distrito dos ang gamiton una, ingon man ang mga gym niini aron makapadayon sa pagtuon ang mokabat 600 ka mga bata.
Padayon gihapon ang pagsulbad sa mga magtutudlo sa mga rekord sa mga estudyante diin maningkamot sila nga makahimo og bag-o nga rekord subay sa mga kopya niini nga ilang napasa sa Division's Office.
Una niini gibutyag ni Janice Ilaguiso, Principal II sa maong tunghaan nga mohimo gayod sila og hinanaling lakang sa maong hitabo.
"Maghimo gyod ta og emergency class, wala na man ta'y laing option, dili pod sila puwede sa gym kay basically wala na man pod sila'y mga bangko. Mag-declare na pod mi nga no records found ani human nga naugdaw na gyod tanang mga records," ingon sa principal nga nahinabi sa mga tigbalita. (Jeepy P. Compio)