DAW kulba-hinam karon ang ikatulong State of the Nation Address (Sona) ni Presidente Rodrigo Roa Duterte gumikan nahagit pagsamot ang progresibong pundok nga mohimo og lihok protesta human sila giatubang ug giistoryahan sa Pangulo sa ikaduhang Sona niini.
Apan suma ni Special Assistant to the President (SAP) Bong Go, di na mahitabo ang gihimo ni Pangulong Duterte niadtong milabay'ng Sona tungod bastuson lang sab siya sa mga militante.
Niya pa nga moatubang ang Pangulo kanila kung ugaling sunogon nila ang (effigy) kurte sa nawong sa Pangulo, agi'g ilang protesta.
Sa Davao City, andam ang Davao City Police Office (DCPO) sa pagpatuman sa maximum tolerance ugaling makasamok na sa publiko ang mga gituohang raliyesta nga mohimo og welga karong adlawa.
Sa naunang pakighinabi kang DCPO Spokesperson Senior Inspector Ma. Theresita Plaza-Gaspan nga andam na ang kapulisan sa DCPO ugaling dunay matigayong kasamok sa lihok protesta nga himuon karon sa mga progresibong pundok.
Gisulayan og kuha sa SuperBalita pinaagi sa pagtawag sa telepono ang kabahin sa mga militante kung unsa ang ilang mga aktibidad karong adlawa, apan bisan usa sa lima ka gitawagan walay nanubag.
Samtang didto sa Davao Del Sur naghinam-hinam na ang mga mag-uuma nga hisgutan sa Pangulo ang isyu sa Tax Reform for Acceleration and Inclusion (Train) Law nga alang nila nakaapekto na sa ilang pagpananom og humay.
Alang ni Marcelo, 51-anyos, bisan og giwagtang sa gobyerno ang ilang galastuson sa patubig sa irigasyon apan gikinahanglan pa nilang mogasto og lana alang sa pag-atiman sa ilang mga kahimanan sa basakan sama sa traktor.
Gikinahanglan mo-arkila ang usa ka mag-uuma og traktor nga anaa sa P2,500 ngadto P3,000 sa matag ektarya nga ilang darohon isip preparasyon sa pagpananom sa basakan.
Sa matag tanom mobayad sab ang mga tag-iya sa basakan ngadto sa mga mag-uuma aron makatanom og palay.
Hinuon, wa mousbaw ang matag sako sa palay nga ilang itanom sanglit nagpabilin kini sa P1,200 matag 40 kilo nga sud sa sako. (Uban sa taho ni Jeepy P. Compio)