NAKADAWAT og pagdayeg ug pagyukbo ang usa ka Sugbuanong engineer sa siyudad sa Taizhou nga namatay ug nidonar sa mga parte sa iyang lawas ngadto sa unom ka mga pasyente sa China.
Si Wilbert Abear, 49, usa ka senior test engineer sa electronics manufacturer Littelfuse, ang labing unang langyaw sa Taizhou nga nidonar og organs ngadto sa mga pasyente.
Gituman sa iyang pamilya ang pagdonar sa iyang organs nga maoy iyang pangandoy sa dihang buhi pa.
Siya namatay gumikan sa cerebral hemorrhage.
Sa usa ka hulagway nga nikatap sa online, nagpakita sa mga doktor ug mga nars sa Taizhou City People’s Hospital nga niyukbo atubangan sa lawas ni Abear ug kini nakapahilak sa iyang pamilya.
Gisaysay ni Wilson Abear, igsuon ni Wilbert nga nagbase dinhi sa Sugbo, nga gikan sa balay sa dakbayan sa Wuxi ang iyang igsuon ug nagmaneho kini og sakyanan padung sa panimaly sa iyang higala mga tulo ka oras ang gilay-on dihang kalit kini na-stroke sa expressway sa Taizhou niadtong Hulyo 6.
Ang mga higala ni Wilbert nangita sa lokasyon niini pinaagi sa global positioning system (GPS) dihang wa kini magpakita pipila ka oras ang nakalabay samtang ang asawa niini nga si Shaoqin Wang sa Wuxi kay nanawag na og pulis.
Napalgan sa mga pulis si Wilbert nga wala nay panimuot sud sa iyang awto ug gidali kini og dala sa ospital diin gipaubos kini sa duha ka operasyon aron mapugngan ang cerebral hemorrhage.
Matod ni Wilson, pagka sunod adlaw gipahibawo ang ilang pamilya dinhi sa Sugbo nga na-coma si Wilbert.
Ang ilang inahan nga si Felicidad dali nga niadto sa China niadtong Hulyo 12.
Dugang niini nakahukom ang ilang pamilya nga buhian na si Wilbert human masayri sa ilang inahan nga nanugon kini nga dili magpa-revive sa higayon makasinati og medical emergency ug idonar ang iyang organs kon siya mamatay.
“He had the best doctors. They still tried to save him. Just before his life support was removed, three doctors from Shanghai examined him. We were told he was gone,” asoy ni Wilson.
Siya nipaambit nga hilabihan ang kalipay nga gibati sa ilang pamilya dihang gipasidunggan ang ilang igsuon didto sa China.
“We did not expect that he would be honored. We did not expect anything,” dugang ni Wilson.
Sud na sa 18 ka tuig nga nanarbaho ug nanimuyo si Wilbert didto sa China.
Sa iyang pagkamatay, nailo niini ang iyang duha ka mga anak nga mga babaye, 9 anyos ug 12 anyos.
Siya gi-cremate ug dad-on og balik dinhi sa Sugbo. (SCG, SunStar Philippines)